O Foro Tecnolóxico de Emprego abriu as súas portas con 40 empresas tendendo pontes co alumnado
xoves, 5 de marzo do 2020
O
Foro
Tecnolóxico de Emprego, organizado integramente por estudantes da
Escola de Enxeñaría de Minas e Enerxía, a Escola de Enxeñaría de
Telecomunicación e a Escola de Enxeñería Industrial (todas do
Campus de Vigo), arrancou este mércores 4 de marzo cun acto
inaugural no que o reitor da Universidade de Vigo, Manuel Reigosa,
fixo unha reivindicación do talento que se xera nos tres campus da
institución e demandou unha aposta firme por retelo en Galicia. O
foro alongarase ata o venres pola tarde e abrangue un espazo con
postos de preto de 40 empresas nos que se pode entregar currículos,
obradoiros, mesas redondas e sesións formativas.
Á
fronte da organización está Candela Janeiro, estudante da Escola de
Enxeñaría de Telecomunicación, que explicou que o evento “resulta
de grande interese para o alumnado”, posto que lle achega “unha
oportunidade de coñecer a realidade laboral da carreira que estudan
e, ao tempo abrir os seus horizontes, non só conseguindo unha
oportunidade de traballo, senón tamén coñecendo unha maneira de
redirixir os seu estudos e formación cara novas metas ou
obxectivos”.
O
foro acollerá durante tres días un amplo abano temático de
actividades: dende unha feira con postos de empresas instalados no
vestíbulo da EE de Minas, pasando por obradoiros, conferencias,
mesas redondas e talleres sobre dinámicas de grupo, personal
branding, xestión de habilidades, claves para a inserción
laboral en diferentes sectores, responsabilidade empresarial ou tamén
con presentacións de empresas ou os avances e retos de diferentes
sectores tecnolóxicos. En total, están implacadas arredor de 40
firmas de diferentes eidos, como Optare, Deloitte, Brainport,
Cortizo, os diferentes colexios profesionais, Indra, Televés, R,
Altia, Pescanova ou FINSA, entre outras, son xa veteranas no foro, e
a elas súmanse novas incorporacións como o grupo Oesía, GBTec,
EGATEL ou PWC.
Este
ano introducise a posibilidade de entregar currículos en liña, co
fin de axilizar o proceso de procura de emprego, aínda que se deixou
operativa a posibilidade de facelo en persoa nos stands. O
obxectivo está posto en acadar ou superar as cifras da pasada
edición, con 1500 currículos recollidos e unha taxa de éxito moi
alta, xa que segundo as enquisas realizadas ao alumnado que
participou en 2019, un terzo atopou traballo e preto do 40% recoñece
que lle serviu para orientar os seus estudos por recomendacións das
empresas.