O Dicionario de pronuncia da lingua galega amplía os seus contidos en liña
mércores, 23 de outubro do 2013
O Dicionario de pronuncia da lingua galega
promovido polo Instituto da Lingua Galega (ILG) da USC en colaboración coa
Consellería de Cultura, Educación e Ordenación Universitaria e a Radio Galega, presentou
hoxe no Colexio de San Xerome unha edición ampliada e mellorada, nun acto
ao que acudiu o secretario xeral de Política Lingüística, Valentín García; quen
estivo acompañado polo reitor da USC, Juan Casares Long; o director do ILG,
Ernesto González Seoane; e o coordinador do equipo técnico que desenvolveu o
proxecto, Xosé Luís Regueira Fernández.
Valentín García salientou que esta ferramenta “supón un referente no tocante á
dimensión oral da lingua e, nomeadamente, a prol da mellora da calidade e do
prestixio do idioma propio de Galicia nos ámbitos públicos”, resultando de
grande utilidade para a aprendizaxe do galego ao ofrecer un modelo oral de
referencia e consulta.
A nova versión ampliada e mellorada que se presentou hoxe constitúe un recurso
que ofrece en liña o léxico galego contido no dicionario da RAG achegando as
transcricións fonéticas e locucións correspondentes a unhas 68.000 formas
gravadas. Amais de incorporar as voces máis recentes do dicionario da RAG, o Dicionario de pronuncia da lingua galega
recolle xa os 1.000 nomes propios de persoa máis frecuentes, 1.500 apelidos
galegos e os nomes de todas as comarcas, concellos e parroquias de Galicia, así
como varios centos de nomes de ríos, montes e accidentes costeiros, nunha
aplicación informática que permite realizar as buscas por formas fonéticas ou
por cadeas de sons. O dicionario engade desta volta voz feminina, a da coñecida
xornalista Belén Regueira.