O Consorcio da Zona Franca aproba uns orzamentos de 43 millóns, unha boa parte deles dirixidos á innovación

O Consorcio da Zona Franca de Vigo expuxo este mércores os orzamentos para o ano 2015. Segundo fixo saber a delegada Teresa Pedrosa no transcurso do pleno do Consorcio, a política de investimentos para o vindeiro ano “busca un equilibrio entre unha aposta firme pola mellora da industria local, que se aglutina ao redor da actividade do polígono de Balaídos, e polos programas de apoio ao emprendemento e á innovación”. A estas dúas liñas principais na asignación de recursos económicos, o Consorcio suma outras partidas centradas no apoio ás empresas locais para que estas dispoñan de instrumentos que lles á internacionalización e á mellora en innovación dos seus procesos e produtos. Entre estas liñas e a actividade tradicional de promoción de solo en parques empresariais, o ano que vén o Consorcio de a Zona Franca prevé investir 43 millóns de euros na área de Vigo.
No que se refire a Balaídos, o orzamento será de 15.850.618 euros entre construción de novas naves, mellora de accesos e actuacións de eficiencia enerxética. Nas áreas de emprendemento, innovación e internacionalización destínanse partidas asignadas a programas por unha contía total de 10.237.994 de euros. O investimento en desenvolvemento de solo, a terceira gran cantidade destes orzamentos, será de 7.998.339 euros. Asignaranse á ampliación do Parque Tecnolóxico, as obras en Porto do Molle, o parque de Matamá e a PLISAN.
Volvendo ás áreas de emprendemento, innovación e busca de novos mercados, ás que se van destinar 10.237.994 euros para 2015, Pedrosa quixo salientar perante o Pleno o feito que en 2016 volverase realizar unha achega dun millón de euros máis á sociedade Vigo Activo para continuar cos fondos de capital-semente dos que se nutre a aceleradora. A delegada lembrou que esta semana (hoxe xoves) remataba o prazo de presentación de ideas á segunda convocatoria da aceleradora de empresas VíaVigo, unha iniciativa que nesta edición, ademais dos fondos achegados polo Consorcio contará tamén con fondos da Xunta de Galicia (a través de GAIN e Xes Galicia dotará á aceleradora de 250.000 euros a fondo perdido e 500.000 en préstamos participativos). A delegada tamén recordou que aos proxectos xa coñecidos de viveiros de empresa, o vindeiro ano uniranse a incubadora para transferencia de tecnoloxía aeroespacial que se situará en Porto do Molle e o Centro de Evolución Gastronómica que se situará en Vigo.