O Consello da Cultura Galega inaugura colección de e-books cun poemario de Paz Andrade

Co gallo do Día das Letras Galegas o Consello da Cultura Galega editou como facsímile o poemario Canto do pobo disperso escrito en 1955 por Valentín Paz Andrade, e hoxe mellora a súa distribución publicando a obra tamén en formato dixital (ePUB) o que facilita a súa lectura en eReaders, tablets e outros dispositivos de lectura, e inaugurando a colección de libros electrónicos do Consello.
Esta edición estivo ao coidado de María Xesús Lama, profesora da Universidade de Barcelona, e autora do estudo introdutorio deste poemario inédito que xa pode descargarse de balde.