O Concello e a Deputación de Ourense supervisan a vindeira sede de Provincia Intelixente
luns, 29 de xullo do 2019
Este
sábado 27 de xullo o
presidente da Deputación de Ourense, Manuel Baltar, e o alcalde da
cidade das Burgas, Gonzalo Pérez Jácome, visitaron as dependencias
de Abanca que darán acubillo á sede da iniciativa Provincia
Intelixente e ao Centro de Intelixencia Artificial de Ourense.
Estes proxectos, que comparten o nexo común de facer avanzar a
provincia cara a vangarda dixital, veñen da man das dúas entidades
que representan Baltar e Pérez Jácome, respectivamente.
Baltar
salientou “o excelente estado” no que se atopa o edificio para
acoller o que sería, nas súas palabras, “o gran centro local de
emprego tecnolóxico”, en referencia á iniciativa Provincia
Intelixente, un proxecto no
que leva traballando a Deputación dende hai anos e que “vai abrir
as súas portas nos vindeiros meses”, en colaboración con IBM (a
través da filial Viewnext).
Respecto
do Centro de Intelixencia Artificial, o Concello e a Deputación
sinalaron que será un referente de innovación que situará a cidade
na vangarda mundial da Intelixencia Artificial. Segundo fixeron
saber, o feito de que este polo de innovación estea emprazado nas
proximidades do que será o Centro Galego de Innovación na FP e a
pouca distancia da Tecnópole, o Parque Tecnolóxico de Galicia,
“fará deste espazo unha infraestrutura de futuro e innovación
onde Concello e Deputación podemos poñer en valor Ourense cidade e
Ourense provincia”.
Gonzalo
Pérez Jácome valorou positivamente a “calidade das instalacións”
e o seu carácter futurista, “a pesares de levar dúas décadas
construído”. Segundo fixo saber, trátase dunhas instalacións que
están preparadas para funcionar dende xa.
O
alcalde de Ourense sinalou que este “non será o edificio
definitivo da Intelixencia Artificial en Ourense, que deberá ter as
súas propias instalacións, pero para dar inicio ao proxecto pode
ser o máis propicio”. E engadiu: “Levamos unha moi boa
impresión e imos ver se de aquí a uns meses estas instalacións
acollen científicos traballando no futuro Centro de Intelixencia
Artificial de Ourense”, expresou.