O Concello de Lugo pon a punto a aula CeMIT de Lamas de Prado
venres, 25 de outubro do 2019
A
aula CeMIT do
Castiñeiro en Lugo (o Centro para a Modernización Tecnolóxica
de Lamas de Prado), un dos centros neurálxicos da cidade en materia
de divulgación e formación dixital, está a ser obxecto de
melloras. A
alcaldesa Lara Méndez deu onte conta dos labores de posta a punto,
que pasan por amañar as filtracións de auga detectadas no edificio,
unhas filtracións que teñen especial incidencia na fachada que dá
á rúa Juana la Loca, onde é preciso picar o sollado de formigón
que se atopa afectado polo asentamento do terreo. Amais farase un
selado en todas as vertentes do inmóbel, “para evitar que se
produzan problemas semellantes”.
Os
traballos, que teñen un prazo de execución dun mes, están
orzamentados en 8.452’43€ (IVE incluído) e, segundo fixo saber a
alcaldesa, “terán repercusión tanto no aspecto estético da
construción como na confortabilidade do centro”. As tarefas a
desenvolver complementaranse co acondicionamento das escaleiras de
madeira que dan acceso ao andar baixo, que serán lixadas e
vernizadas ao igual que o resto do material de carpintaría.
Lara
Méndez fixo fincapé no “importante papel dinamizador” que xogan
estas instalacións tecnolóxicas no barrio no que se emprazan, así
como “o labor didáctico que se desenvolve nelas”, xa que
“ademais de contar cunha ampla programación formativa de xeito
continuado facilítase a disposición das aulas ás asociacións
locais para que poidan desenvolver nelas as súas actividades”.