O Concello de Lugo inicia unhas xornadas para mostrar á mocidade hábitos dixitais saudábeis
luns, 15 de marzo do 2021
O
Concello de Lugo (a través do Servizo Municipal de Prevención de
Drogas) vai organizar unha serie de actividades de formación e
sensibilización para mostrar á mocidade xeitos saudábeis e
racionais de tirar proveito das novas tecnoloxías da información.
Foron dadas a coñecer este sábado pola concelleira de Muller,
Igualdade e Xuventude, Ana González Abelleira. Trátase
dunhas xornadas online de adiccións sen substancias,
organizadas no marco da programación do +Xti, e subvencionadas polo
Plan Nacional de Drogas.
A
edil destacou que “abondando no coñecemento do contexto social da
mocidade lucense, nos seus hábitos e condutas, dende a área de
Xuventude queremos seguir traballando na promoción de pautas
saudábeis para que a rapazada atope unha alternativa de ocio e
entretemento acorde non só a súa idade senón tamén encamiñada ao
seu propio benestar e coidado persoal”.
Ana
Abelleira destacou, alén, que a programación prevista levarase a
cabo adaptándose ás circunstancias sanitarias da pandemia.
As
actividades, que comezarán este luns 15 de marzo, poderán seguirse
a través da Lugomasxti.org.
Iniciará
estas charlas, dirixidas ao público xuvenil, profesionais e
familias, a doutora en Psicoloxía, docente e investigadora, Patricia
Gómez Salgado, co relatorio Relacións e redes: practiquemos o bo
trato.
Sobre
relacións dixitais, sexualidade, contidos e hipersexualidade falará
a psicóloga xeral sanitaria e social Janet Díaz Portela; e os
videoxogos, xogos de apostas e redes sociais serán abordadas, como
armas de dobre fío polo psicólogo social, deportivo, laboral e
educativo Iván Pico Martínez.
Completa
o cartel o delegado de Participación Cidadá da Comisaría de
Policía de Lugo, Rubén Darío Veiga, que afondará nos riscos e
perigos das redes: as responsabilidades penais.
Unha
vez rematados os relatorios, as persoas interesadas en participar,
poderán trasladar as súas dúbidas empregando o enderezo
electrónico prevenciondrogas@lugo.gal.