O Concello da Guarda quere poñer o seu Mercado Municipal na vangarda tecnolóxica
venres, 26 de agosto do 2022
O
Concello
da Guarda vai optar a financiamento europeo para materializar a
última fase de modernización do seu mercado, un proceso que
implica múltiples frontes de dixitalización para, en última
instancia, mellorar a experiencia dos clientes, incrementar as
vendas, ampliar mercado, incrementar competitividade e facer marca
nas redes e buscadores. Deste xeito, o pasado 4 de agosto presentouse
ante o Ministerio de Industria, Comercio e Turismo un proxecto
integral de apoio ao comercio establecido no Mercado Municipal da
Guarda no que se solicita unha axuda de 261.172€ procedentes do
Plan de Recuperación, Transformación e Resiliencia.
Segundo
informa o Concello, a intervención ten como obxectivo “converter o
inmóbel nun referente en calidade, nun espazo para a cohesión
social que actúe como tractor do comercio minorista, e en definitiva
como dinamizador económico para o resto do comercio local”.
Algunhas
das accións concretas que se incluirían dentro desta actuación
serían a instalación de armarios individuais intelixentes para a
recollida de pedidos fóra do horario comercial do mercado, un
programa de formación e mentorización individual para praceiros/as
sobre ferramentas dixitais e fomento da economía circular, a
creación dun observatorio do comercio, campañas de mercadotecnia
dixital, diversas actuacións para fomentar a redución no uso de
bolsas e envoltorios de plástico, ou a creación dun espazo
denominado A cociña do mercado, que o Concello quere
converter nun foco de actividades de dinamización e posta en valor
dos produtos do mercado.