O Concello da Coruña e Ferrovial cederán equipos informáticos destinados a finalidades sociais
martes, 21 de febreiro do 2023
O
Concello da Coruña (a través da Fundación EMALCSA) e Ferrovial
Servizos (Serveo) puxeron en marcha un novo acordo de colaboración a
través do que se doarán equipos informáticos para o
desenvolvemento de diversas iniciativas sociais na cidade. Ao abeiro
deste acordo, Serveo
doará un total de 47 equipos informáticos de sobremesa, oito
ordenadores portátiles, dous teclados e 13 ratos de mesa co
obxectivo de “apoiar e levar a cabo proxectos de índole social,
destinados aos colectivos en risco de exclusión social”.
Os
equipos destinaranse a tres fins principais: á realización de
cursos e obradoiros a través de asociacións e entidades
beneficiarias dos programas Deporte Solidario e Inclusivo e
Cultura Accesíbel e Inclusiva, da Fundación
EMALCSA; á súa cesión a familias en situación de risco ou
exclusión social para o seu uso por menores escolarizados, con fins
didácticos, e, por último, á cesión a entidades non lucrativas de
iniciativa social e domiciliadas no ámbito territorial da Coruña,
axudando ao desenvolvemento dos seus fins de utilidade social.
O
acto de formalización do convenio celebrouse este venres 17, ás
12.00 horas, na sede da asociación Participa para la Inclusión
Social.
A
concelleira de Igualdade, Benestar Social e Participación Cidadá, e
vicepresidenta da Fundación EMALCSA, Yoya Neira, e a delegada de
Serveo en Galicia, Inmaculada Arena Lanzas, asinaron o acordo,
acompañadas polo xerente da Fundación EMALCSA, Manuel Aguilar; a
directora do servizo municipal de Igualdade, Benestar Social e
Participación Cidadá, Carmen Pita; a encargada de relacións
institucionais de Serveo, Ángeles Borrajo, a xerente de estratexia e
planificación de Serveo, Arantxa Martín; e, por último, a
representante da asociación Participa para la Inclusión Social,
María Martínez Lemos.