O Concello da Coruña achega formación dixitalizadora para combater o desemprego
venres, 25 de marzo do 2022
A
Concellería de Educación, Memoria Histórica, Innovación,
Industria e Emprego do Concello da Coruña vai
achegar esta tempada unha nova iniciativa de formación en liña
totalmente gratuíta para residentes no municipio. Trátase dun
programa que pon o foco nas novas tecnoloxías (recursos cruciais
para fomentar a empregabilidade) e que ten por obxectivo potenciar as
habilidades das persoas participantes, crear mellores perfís
profesionais e académicos e xerar maiores probabilidades de
contratación en futuros empregos. “Desde os nosos fogares, podemos
continuar ampliando coñecementos sen necesidade de acudir a un
centro de formación”, sinala o Concello.
O
prazo de inscrición será do 28 de marzo ao 13 de abril e poderase
matricular na páxina web
municipal.
Cada
persoa poderá seleccionar as accións formativas das áreas de
especialización: idiomas (inglés, francés e alemán en distintos
niveis) e administración de empresas (seguridade informática,
sinatura dixital, notificacións e rexistros electrónico, trámites
en liña coa administración, comunicación, habilidades directivas
... )
“Todas
as accións formativas levan competencias moi demandadas na
dixitalización que está a experimentar o mercado actual”, explica
o Concello, engadindo que as accións formativas estarán dispoñíbeis
dunha forma integramente en liña e accesibles na modalidade 24/7, é
dicir, durante as 24 horas do día, calquera día da semana.