O Concello compostelán lanza web para recuperar barrios e patrimonio: revivesantiago.gal
mércores, 25 de abril do 2018
O
Concello de Santiago ven de poñer en marcha unha web para informar
dos seus plans e accións concretas para converter a cidade nun
modelo de sustentabilidade e xestión intelixente. Ou
sexa, para informar polo miúdo da súa estratexia EDUSI e do seu
programa ReVive, do que forma parte. A páxina en cuestión,
revivesantiago.gal, foi
presentada onte pola concelleira de Economía, María Rozas, quen
tamén deu a coñecer a imaxe de marca do dito programa, unha aposta
por “simbolizar a procura dunha cidade máis sustentábel desde o
punto de vista social, económico e ambiental”, dixo, poñendo o
foco no investimento total da estratexia: 12,5 millóns de euros.
Sobre o nome da iniciativa, Rozas apuntou que “queremos que a
cidade reviva con actuacións en barrios por tradición
desfavorecidos, con programas de emprego, e accións relacionadas coa
igualdade entre homes e mulleres”.
Asemade,
insistiu na necesidade de poñer en xogo recursos que permitan á
veciñanza “recuperar a cidade e o seu patrimonio, que sexan donos
e donas dos espazos públicos”.
Respecto
da web, sinalou que pretende “facilitar o acceso da veciñanza á
información sobre o que é a EDUSI, na que se inclúen actuacións
orzadas nun total de 12,5 millóns de euros, dos que 10 millóns
proceden de fondos FEDER”.
No
acto de presentación tamén participou Fernando Martínez,
responsábel da oficina técnica da EDUSI, quen fixo saber que “na
nova páxina pódese atopar unha ampla descrición da estratexia e do
programa europeo que a sustenta, e facilita o acceso a unha ampla
documentación vinculada á mesma”, amais de permitir coñecer en
detalle as tres liñas de actuación de ReVive: Accesíbel, Inclusiva
e Patrimonial (así como as actuacións concretas en cada unha
delas). Complétase cun apartado de novas, para facilitar o
seguimento da evolución administrativa de cada acción.