O Colexio de Xornalistas amosa ás reclusas de Pereiro de Aguiar como atopar información veraz nas redes sociais
mércores, 25 de xaneiro do 2023
Este
martes
24 de xaneiro celebrouse a quinta sesión do programa Aprendamos a
ler a información, organizado polo Colexio Profesional de
Xornalistas de Galicia e patrocinado pola Fundación La Caixa.
Participaron, no centro penitenciario de Pereiro de Aguiar, a
xornalista e directora de Voz Audiovisual Fernanda Tabarés e o
director da axencia e consultora de comunicación Punto GA
Comunicación Manuel Vázquez Sola. O programa pretende ser “unha
ferramenta de apoio á reinserción da poboación reclusa feminina a
través de diálogos sobre a actualidade e a súa cobertura nos
medios de comunicación”.
O
Colexio lembra tamén que Aprendamos a ler a información é
unha experiencia na que escritores e xornalistas con obra publicada
ou con colaboracións habituais nos medios de comunicación
trasladarán á comunidade reclusa feminina conceptos básicos para
entender a información, buscala nos medios axeitados e colocala nun
contexto real socioeconómico, “co obxectivo de servir de axuda á
súa reinserción”.
Nesta
cuarta xornada Fernanda Tabarés salientou que unha das ferramentas
para conseguir a reinserción debera ser a información, pero que
moitas das reclusas foran "maltratadas" polos medios, por
cuestións como as penas de telediario, o incumprimento do segredo
sumarial ou "un xornalismo de sucesos mediocre, baseado en
declaracións e tinxido de amarelo". Un panorama aínda máis
complicado pola irrupción das redes sociais, dixo. Manuel Vázquez
Sola, pola súa banda, trasladou ás reclusas algúns datos sobre a
realidade actual da publicidade e alertou sobre o uso de ferramentas
como as redes ou os buscadores para informarse: "Coidado con
como buscades, Google, Facebook, Tik Tok, etc, son axencias de
publicidade. E a publicidade paga para ser vista, a información
non".
No
centro penitenciario de Pereiro de Aguiar están privadas de
liberdade un total de 287 persoas na actualidade, das que 21 son
mulleres, que conviven nun módulo do recinto. O programa Aprendamos
a ler a información desenvolverase neste centro até o mes de
marzo do vindeiro ano, coa participación de distintos xornalistas e
escritores.