O Colexio de Xoiería convoca aos deseñadores galegos para introducilos na tecnoloxía en 3D
xoves, 7 de febreiro do 2013
Segue
adiante o programa de actividades TIC do Colexio Mestre Mateo de
Santiago ligadas ao eido do deseño e elaboración de xoias. Así,
logo dos cursos de especialización propiamente ditos (achegados en
colaboración co Colexio Oficial de Xoieria e acadándose un aforo
completo), chega unha nova actividade formativa, o curso de
iniciación ao 3Design, un
programa para a elaboración de alfaias a través de computador e en
3D. Segundo informa o dito Colexio Oficial, estamos ante unha
ferramenta moi útil e que está a ser empregada por múltiples
empresas de todo o mundo (á vista nun documento
en PDF sobre o programa) e tamén da nosa terra, como por exemplo
a firma Ardentia.
Este
curso de achegamento da xoiaría ás TIC é, en
palabras do Colexio Oficial, “especialmente
adaptado á actualidade que vivimos, na que a demanda de xoias
exclusivas, únicas, vai aumentando cada día”.
En virtude desta actividade, o alumnado
aprenderá a estrutura do interface do programa e menús e debuxará
en 2D e 3D con sólidos e superficies. Tamén creará presentacións
fotorrealistas, preparará a peza de xoiaría para a súa posterior
produción. Ao final do curso, o alumnado poderá desenvolver pezas
en 3D, tanto para prototipar coma para realizar catálogos e
mostralos nunha páxina web. “O deseñador
será quen de crear de xeito interactivo
cos seus clientes, en tempo real, calquera xoia”,
informa o colexio profesional galego. A
actividade formativa virá da man de Manuel Piñeiro, xoieiro e
experto docente do programa 3Design.