O Clúster de Turismo mostra aos nosos profesionais como facer marca nas redes
martes, 28 de agosto do 2018
Mercadotecnia
dixital, atención ao cliente, captación e mantemento de viaxeiros e
recursos para facer mercado. Estes
son algúns dos ingredientes do menú formativo que prepara o
Clúster de Turismo de Galicia para o vindeiro trimestre en dez
localidades das nosas catro provincias. Trátase dunha serie de
seminarios, obradoiros e xornadas para profesionais do noso sector
turístico turístico: arredor de 100 horas de formación a
desenvolver entre os meses de setembro e novembro. Con esta nova
contribución ao impulso das empresas, o Clúster quere seguir
afondando na cualificación dos equipos humanos do sector.
Algúns
destes talleres impartiranse en diferentes localidades galegas como
Lalín, Pontevedra, Vigo, A Coruña, Sanxenxo, Monforte ou na área
de Costa da Morte mentres que outras xornadas desenvolveranse en
exclusiva en Santiago de Compostela.
O
obxectivo final é “que o maior número de profesionais poidan
acceder de balde e de maneira doada á formación”, precisa, en
palabras do Clúster, “para afrontar con garantías as esixencias
do mercado actual, tal e como se veu facendo nas anteriores edicións
deste plan de formación”.
O
programa porase en marcha o 4 de setembro cunha charla de José
Alcañiz ao redor dunha das temáticas que se estudarán máis
plenamente nos obradoiros, a mercadotecnia (marketing) dixital
orientada ao sector turístico. Esta charla servirá de presentación
dun programa de adestramento para directivos sobre a devandita
temática de promoción de negocio nas redes: unha achega formativa
de 100 horas que se vai impartir de forma presencial en Compostela os
martes e mércores pola tarde entre os meses de setembro, outubro e
novembro. Durante este tempo abordaranse cuestións como estratexias
de diferenciación na empresa turística; revenue
management; xestión de compra e melloras financeiras,
mercadotecnia dixital, estratexias e oportunidades de
internacionalización ou liderado, entre outras.
Tanto
este programa concreto como o resto das accións formativas desta
edición estarán a cargo do IESIDE para o que se contará cun equipo
de profesionais con ampla experiencia tanto a nivel formativo como de
experiencia sectorial.
O
calendario completo de xornadas, obradoiros e seminarios xa pode
consultarse na web do Clúster,
desde onde os interesados poderán acceder a cada un dos eventos e
realizar a inscrición, cuxo prazo xa está aberto. O adestramento
achegado por estas actividades é de balde.