O Clúster da Auga Mineral e Termal terá aplicación móbil para sistemas Android
venres, 19 de agosto do 2016
A Consellería
de Economía e o Clúster da Auga Mineral e Termal de Termal de
Galicia veñen de asinar un acordo de colaboración para reforzar o
espallamento internacional do sector. Os detalles do convenio
foron dados a coñecer polo conselleiro de Economía, Francisco
Conde, e máis polo presidente do Clúster, Antonio Garaloces. A
alianza inclúe o desenvolvemento de dúas accións nas que,
sinalaron, “a innovación xogará un papel estratéxico”. Así,
por unha banda, crearase e estenderase a marca Auga de Galicia, un
selo que identificará a calidade do produto e que poderá ser
empregado por todas as entidades de envasado de auga mineral -en
Galicia, 11- e polos 21 balnearios da nosa terra. Pola outra
desenvolverase unha aplicación para teléfono móbil.
A ferramenta para dispositivos, Terras da Auga,
estará dispoñíbel para sistemas operativos Android e será de
acceso gratuíto para todo o público. A través dela poderemos
consultar a localización dos mananciais de auga mineral e dos
balnearios, así como dos perímetros de protección dos acuíferos
existentes en Galicia. Esta aplicación supón unha posta a punto
dunha ferramenta xa
dispoñíbel para sistemas iOS, que tamén vai ser obxecto dunha
actualización.
Segundo fixeron saber Economía e máis o Clúster,
“estas novas propostas facilitarán o posicionamento das empresas
do sector nos principais mercados, impulsando a imaxe de calidade,
sustentabilidade e innovación do sector a nivel internacional”. Ao
fío disto, Conde salientou que o convenio é especialmente relevante
porque trata “dun recurso estratéxico para Galicia”, tanto polo
seu valor cultural e patrimonial, con máis de 300 mananciais, como
polo peso que ten no desenvolvemento presente e de futuro do turismo
e da economía galega, “o que se traduce na creación de postos de
traballo cualificados”, engadiu.