O Cluster TIC Galicia intégrase na rede europea ATClusters
luns, 21 de febreiro do 2011
O Cluster
TIC Galicia, asociación sen ánimo de lucro creada no noso país con vistas a
vertebrar o sector galego das Tecnoloxías da Información e a Comunicación, vén
de ver cumprido un dos seus principais obxectivos, ao integrarse no proxecto
europeo de cooperación ATCluster, creado para impulsar o desenvolvemento deste
tipo de organizacións na área atlántica.
Segundo informan dende a entidade, ATClusters
traballa, entre outras cousas, na identificación de boas prácticas, na análise
das condicións políticas que favorecen os agrupamentos empresariais e na
exploración de vías de cooperación entre eles; así como, e en definitiva, “na promoción da creación e desenvolvemento
de clusters e meta-clusters nos países europeos da área atlántica”.
Dende
febreiro de 2010, o Cluster TIC Galicia concentra os seus esforzos en poñer en
valor o sector das Tecnoloxías da Información e a Comunicación (que na nosa
Comunidade representa o 2,15 por cento do PIB) algo que se consegue pasando por
darlle pulo á colaboración entre as empresas e coordinando esforzos nun mesmo
obxectivo.
Agora, coa
integración da entidade galega en ATClusters, esta tarefa vai resultar máis
doada de materializar e supón, en palabras do seu presidente, Rafael Valcarce,
“un paso máis no traballo que desde o
noso Cluster se está a facer para implantar modelos de xestión excelentes, que
nos permitan ofrecer aos nosos asociados ferramentas e servizos para impulsar a
súa competitividade e o crecemento do seu negocio, respondendo a necesidades
como o financiamento, a formación ou a internacionalización”.
Valcarce
asegura que a integración en ATClusters aportaralle, asemade, “un mellor coñecemento” do traballo que
están a desenvolver organizacións similares ao Cluster TIC Galicia noutros
países europeos, e neste senso, formar parte da mesma asociación axudaralle a
sumar forzas para que “a nosa voz sexa
oída pola sociedade civil e os nosos lexítimos intereses sexan tidos en conta
nas decisións políticas”.
Esta rede
cooperativa está liderada polo Instituto Galego de Promoción Económica (IGAPE),
en colaboración coa Sociedade para o Desenvolvemento Rexional de Cantabria
(Sodercan), a South West Rexional Authority de Cork (Irlanda), o Instituto de
Desenvolvemento do Principado de Asturias (Idepa), a Agência de Desenvolvemento
Rexional do Vale do Ave (Portugal) e a sociedade Bretagne-Innovation (Francia).