O Campus de Ourense clarifica os enleados conceptos que acompañan ao diñeiro electrónico
luns, 21 de marzo do 2022
Este
venres
18 proseguiu no Campus de Ourense o Curso de Actualización Xurídica
da Facultade de Dereito. Fíxoo cunha sesión centrada no diñeiro
electrónico e os criptoactivos. Nela, Agustín Madrid, catedrático
de Dereito Mercantil da Universidade Pablo de Olavide de Sevilla,
ofreceu unha perspectiva xurídica sobre esta cuestión explicando
como “agora mesmo carecemos da normativa necesaria” neste eido.
A
conferencia foi presentada por Susana González, profesora contratada
doutora de Filosofía do Dereito e vicedecana da Facultade de
Dereito, e Ana María Tobío, catedrática de Dereito Mercantil da
UVigo.
Cada
conferencia deste curso está organizada por unha área diferente da
facultade. Desta volta fo a quenda da Área de Dereito Mercantil. Na
benvida a Agustín Madrid, destacouse a dilatada traxectoria do
relator e a pertinencia de abordar unha cuestión de moita
actualidade como é o diñeiro electrónico tanto desde o punto de
vista económico como xurídico.
Na
súa intervención o relator aclarou “conceptos erróneos”
arredor del e dos criptoactivos e achegouse á realidade e os retos
de futuro neste eido desde un punto de vista xurídico. Sobre o
diñeiro electrónico apuntou que “uns medios o son e outros non
aínda que os chamemos así”. Igualmente, sobre os criptoactivos
indicou que “hai unha clase deles que encaixan co diñeiro
electrónico e outros que non teñen nada que ver”. Así,
detallou, “aínda que o diñeiro electrónico é un instrumento, un
medio de pago que emprega as novas tecnoloxías, cando falamos de
criptoactivos non só estamos falando de medios de pago, senón que
en realidade na actualidade estanse a utilizar fundamentalmente como
un instrumento de investimento”. Porén, indicou, “existe esa
dobre vertente e desde o punto de vista xurídico é relevante ver os
aspectos do seu uso como medio de pago ou como instrumento de
investimento”.
No
que respecta ás criptomoedas, Agustín Madrid explicou que “o seu
propio nome leva a confusión. Dicimos que son cripto, porque
empregan tecnoloxías criptográficas, en concreto blockchain,
e o de moedas refírese a que é un instrumento de pago, un
equivalente funcional do diñeiro en efectivo, e non sempre é así”.
Deste xeito, detallou, “chamamos moeda a algo que fundamentalmente
se está empregando como instrumento de investimento e sobre todo de
investimento especulativo e non como forma de pago”. Os que os
teñen por exemplo bitcoins, apuntou, a primeira criptomoeda,
“non os adquiren ou teñen para usalo para pagar a compra, o xornal
ou un coche. Téñenos con outra finalidade”.
Neste
contexto, o catedrático de Dereito Mercantil explicou que a nivel
xurídico os grandes retos para o lexislador son dous. En primeiro
lugar, introducir no ordenamento xurídico ferramentas que permitan
configurar xuridicamente estes instrumentos. En segundo lugar,
atribuír ás autoridades en materia monetaria, en materia de
investimento, como por exemplo o Banco de España ou a Comisión
Nacional do Mercado de Valores, as competencias para a súa
supervisión.