O Campus de Ferrol acolleu a presentación dunha guía STEM para docentes
venres, 29 de setembro do 2023
O
Edificio de Batallóns do Campus Industrial de Ferrol acolleu este mediodía a presentación dos resultados do
proxecto europeo Erasmus+ STEM is inspiring future careers que
lidera a profesora da Escola Politécnica de Enxeñaría de Ferrol
(EPEF), Laura Castro Santos. Esta iniciativa deu como resultado,
entre outros recursos, unha guía STEM (siglas de Ciencia,
Tecnoloxía, Enxeñaría e Matemática) para docentes.
Segundo
se fixo saber na presentación, no proxecto colaborou o profesorado
dos centros de ensino secundario Antalya Il Milli Egitim Mudurlugu e
Europe Route Education Youth Sports and Culture Association de
Turquía, do colexio G.G. Eurosuccess Consulting Limited de Chipre e
do CPR Nuestra Señora del Carmen La Grande Obra de Atocha de
Betanzos (A Coruña).
Logo
de máis de 22 meses de traballo, os integrantes presentan unha guía
STEM dirixida ao profesorado de Secundaria que pretende potenciar o
entusiasmo do alumnado mellorando así as súas habilidades no eido
das Ciencias, da Tecnoloxía, da Enxeñaría e das Matemáticas. A
guía consta dun total de catro capítulos. O primeiro deles céntrase
no método de ensinanza e aprendizaxe STEM a través de situacións
da vida real. O segundo destaca as habilidades científicas que deben
deter os estudantes, o terceiro salienta o uso eficiente das novas
tecnoloxías e o cuarto capítulo recalca a necesidade dunha
colaboración transnacional para estimular o coñecemento STEM nos
centros educativos de Secundaria. A isto hai que sumarlle as 30 guías
docentes que o grupo de traballo elaborou para a posta en marcha de
actividades nos eidos das enerxías renovábeis, da hidrodinámica de
arrecifes artificiais, da enxeñaría de materiais ou da economía.
A
profesora da Universidade da Coruña, Laura Castro Santos, lidera un
proxecto europeo no que tamén colaboraron os profesores da Escola
Politécnica de Enxeñaría de Ferrol (EPEF), Almudena Filgueira
Vizoso, Ana Isabel García Díez, Manuel Ángel Graña López, María
Isabel Lamas Galdo e Luis Carral Couce, así como os profesores da
Facultade de Economía e Empresa do Campus de Elviña (A Coruña),
Félix Puime Guillén, Lucía Boedo Vilabella, Joaquín Enríquez
Díaz, Begoña Álvarez García e María Dolores Lagoa Varela.
O
proxecto STEM is inspiring
future careers está financiado pola Unión Europea a
través do Programa Erasmus+ e conta un orzamento total de 152.395
euros. A Universidade da Coruña dispuxo de 19.820 euros para formar
ao profesorado nas metodoloxías STEM, elaborar unha guía de
traballo dirixida ao profesorado de secundaria e deseñar guías
docentes para fomentar o STEM nos centros educativos.