O Campus Terra inicia a formación 2023 cun curso sobre diagnóstico empresarial con Power BI
luns, 15 de maio do 2023
O
Campus Terra da USC abre este luns, a partir das 10.00 horas, na
Facultade de Administración e Dirección de Empresas, o
seu programa de formación complementaria específica co seminario
Construír Dashboard Económico-Financeiro con Microsoft Power BI
de 0 a 100, unha actividade organizada xunto co Colexio de
Economistas de Lugo e que será impartida por Manuel Ramón Ramón.
O
curso, estruturado en 14 horas de carácter presencial que se
desenvolverán os días 15 e 16 de maio, en quenda de mañá e tarde,
e homologado a efectos de formación continua obrigatoria para
auditores e como formación para experto contable, capacitará ao
alumnado para facer análises de carácter económico-financeiro para
empresas.
A
preparación e visualización dos estados financeiros de perdas e
ganancias, balance de situación e estado de fluxos de efectivo, o
estudo detallado do diario contábel, as técnicas de modelado máis
apropiadas para deseñar dashboards financeiros e a
xeración de indicadores clave de desempeño (KPI), tanto básicos
como avanzados que orienten o deseño de estratexias empresariais,
constitúen algunhas das cuestións tratadas no curso.
Outros
cursos
O
programa de formación do Campus Terra 2023 contempla, alén deste
módulo formativo sobre Power BI, “un amplo abano de propostas
formativas orientadas tanto aos axentes do sector produtivo, como a
estudantes de grao e mestrado e a persoal docente e investigador da
USC”.
A
oferta, que se irá actualizando e ampliando nas vindeiras datas,
pode consultarse na
web, na que tamén está accesíbel o formulario de inscrición nas
programas xa pechados, entre os que figuran as xornadas sobre
ingredientes e aditivos na industria láctea alimentaria programadas
en xuño na APLTA, ou nos cursos de iniciación á viticultura e
enoloxía ou de elaboración de queixos.
Outros
dos módulos xa incluídos no Programa de Formación do Campus Terra
2023 abrangue temáticas diversas que van desde o programa matemático
MatchCAD, a hábitos e técnicas de estudo, control do estrés,
xestión de tempo e orientado laboral, introdución ao manexo de
drons, plataformas de IoT (Internet das Cousas), Intelixencia
Artificial ou metodoloxías activas para o ensino innovador na
sociedade do coñecemento.