O CPETIG e AMTEGA fornecen contidos de ciberseguridade avanzada a dúas ducias de profesionais
xoves, 8 de setembro do 2016
O Colexio de Enxeñaría Técnica en Informática de Galicia (CPETIG)
quere seguir traballando a prol dunha Sociedade da Información máis
protexida e mellor xestionada. Este compromiso coa seguridade e co
coñecemento salvagardado tense materializado xa nas súas Xornadas
de Informática Xudicial, de
cuxa sexta edición avanzamos algúns detalles en abril, facendo
fincapé no compromiso da axencia AMTEGA con estes eventos.
Precisamente en
colaboración coa Axencia para a Modernización Tecnolóxica de
Galicia (AMTEGA) vai impartir un curso de formación en
ciberseguridade os vindeiros 9, 10, 16 e 17 de setembro. A
actividade celébrase en Santiago, achegando contidos a un
grupo de 25 profesionais.
O curso, informan o CPETIG e AMTEGA, busca “dar resposta ao grave
escollo que supón a ciberdelincuencia para as empresas e
organizacións nun dobre plano”. Por unha banda, engaden, “polos
prexuízos que pode supoñer ao negocio en termos de roubo de
información ou espionaxe e, por outra, polo descoñecemento
xeneralizado do tecido empresarial á hora de integrar e aplicar as
solucións oportunas ante este tipo de delitos”.
A actividade formativa ofrece aos profesionais participantes
coñecementos e capacidades necesarias para a xestión e
administración da seguridade nas organizacións, segundo os modelos
de ameazas actuais. O obxectivo, engaden os organizadores, é “que
adquiran as destrezas para configurar de forma segura os sistemas
operativos e as aplicacións, servizos e tecnoloxías empregadas en
redes corporativas”.
O primeiro dos módulos, previsto para
os días 9 e 10 na Cidade da Cultura, adícase a Protocolos ante
Ciberataques e incidentes en Seguridade TI, e será impartido por
Gonzalo Sotelo, responsábel do equipo de Investigación
Tecnolóxica da Garda Civil de Pontevedra. O contido temático deste
módulo abrangue temas como a preparación de posíbeis incidentes de
seguridade e o manexo destes incidentes, facendo fincapé nos
dispositivos móbiles e as tendencias de novas ameazas.
O segundo dos módulos será os días
16 e 17 de setembro, impartido por Juan Luis G. Rambla, director
técnico da área de seguridade TIC de Sidertia Solutions. O programa
inclúe temas como o “bastionado” dos sistemas, a
rastrexabilidade das accións, as ameazas contra a dispoñibilidade e
a integridade, ou diferentes técnicas de cifrado.
“Ao remate da formación”, explican
fontes do colexio que preside Marcos Mata, “as persoas asistentes
terán coñecementos para facer unha implementación segura da
protección precisa para empresas e organizacións, protexendo os
datos e infraestruturas manexadas en cada unha das súas capas,
controlando tamén os mecanismos para evitar a fuga de información”.