O CPEIG xa prepara a sétima edición da Noite da Enxeñaría en Informática de Galicia
luns, 9 de marzo do 2015
A
nova edición da festa das nosos profesionais das Tecnoloxías da
Información (TI) xa comeza a facer ruído. De feito, o Colexio
Profesional de Enxeñaría en Informática de Galicia (CPEIG) xa nos
confirmou que está a deseñar a sétima convocatoria da súa gala
anual, a Noite da
Enxeñaría en Informática de Galicia, un evento onde se visualizan
ao detalle as contribucións das e dos profesionais da informática
para o desenvolvemento económico da nosa terra ao tempo que se
entregan os galardóns que salientan o labor de
diferentes iniciativas e traxectorias profesionais e académicas. A
data prevista para a celebración da Noite é o 26 de xuño; o
lugar, o Hotel-Monumento San Francisco, en Santiago de Compostela.
O
evento será conducido polo monologuista Dani Delacámara e contará,
en palabras do CPEIG, “con interesantes novidades e sorpresas para
os colexiados e convidados”. Como aconteceu en edicións
anteriores, representantes do empresariado TIC, responsábeis
políticos e das diferentes administracións acompañarán as persoas
colexiadas na cea de gala.
Asemade,
o colexio que preside Fernando Suárez confirma que aínda que segue
aberta a porta para novos mecenas, as empresas e institucións
patrocinadoras de edicións anteriores manifestaron xa a idea de
repetir o seu apoio á Noite, “subliñando así o seu
compromiso co colectivo que representa o CPEIG”.
Dentro da
Noite, recoñecerase
o traballo de distintas persoas, institucións e empresas a prol da
Enxeñaría en Informática. As categorías dos galardóns que
entregará o CPEIG son: Premio Traxectoria Profesional, Premio
Iniciativa Emprendedora, Premio Proxecto Fin de Carreira, Premio
Iniciativa da Administración, Premio Iniciativa Empresarial, Premio
Ada Byron e Premio Iniciativa e-Inclusión.