O CPEIG volve a denunciar as referencias a erros informáticos na prensa
martes, 10 de xullo do 2012
- Imaxe coa que La Voz de Galicia ilustra a nova sobre o suposto erro informático nas farmacias galegas
Nos pasados días distintos medios de comunicación como o
xornal La Voz de Galicia publicaban que “un
erro informático impediu dispensar varios medicamentos” para engadir
que a mencionada incidencia que afectou a todas as farmacias galegas durante unhas
5 horas “debeuse á actualización de
prezos de medicamentos por parte do Ministerio”, o que dende o Colexio
Profesional de Enxeñaría en Informática de Galicia queren destacar que dista
moito do suposto erro informático que
comenta a prensa.
Este malestar do CPEIG
manifestouno o seu presidente, Fernando Suárez Lorenzo, nunha carta ao director
de La Voz de Galicia, onde apunta que un sistema complexo como o que nos
ocupa non se modifica de xeito inmediato, polo que en vez de apuntar a un
suposto erro, debería recoñecerse o
esforzo levado a cabo e destacarse as vantaxes que a informática achega á nosa
calidade de vida ofrecendo confianza na seguridade das transaccións
electrónicas en distintos ámbitos como o sanitario, o bancario ou as relacións
coa Administración.