O CPEIG organiza unha xornada sobre o regulamento europeo na salvagarda da información
martes, 18 de outubro do 2016
O
vindeiro día 25 de outubro temos cita en Santiago coa información e
as máis acaidas metodoloxías para salvagardala e respectala: o que
todas e todos os usuarios da Rede debéramos saber para manter a
confidencialidade e a privacidade das comunicacións e do
coñecemento. Falamos
da Xornada sobre o Regulamento Europeo de Protección de Datos,
que se celebra na Escola Galega de Administración Pública (EGAP) en
horario de mañá. A xornada vén da man do Colexio Profesional de
Enxeñaría en Informática de Galicia (CPEIG). Contarase coa
presenza do catedrático Miguel Ángel Davara como relator. Segundo
sinala a organización, aínda que a cita ten contido xurídico, “vai
dirixida tanto a non xuristas como a profesionais relacionados co
Dereito”. Aquelas persoas que desexen inscribirse poden facelo no
seguinte enderezo: eventos@cpeig.gal.
A
charla, nun plano máis detallado, versará sobre o Regulamento (UE)
2016/679 do Parlamento Europeo e do Consello, de 27 de abril de 2016,
relativo á protección das persoas físicas no que respecta ao
tratamento de datos persoais e á libre circulación destes datos
(Regulamento xeral de protección de datos). A xornada inscríbese no
convenio que o CPEIG mantén coa Axencia para a Modernización
Tecnolóxica de Galicia (AMTEGA).
Segundo
informa o Colexio, a sesión será unha boa oportunidade para
afondarmos na nova normativa comunitaria sobre datos, de aplicación
en España, e tamén para tomarmos contacto cos procedementos a
implantar por parte de empresas e administracións. Tamén será unha
maneira de ampliarmos coñecemento en materia de prevención de
riscos co obxectivo de evitar unhas sancións que poden chegar até
os 20.000.000 euros ou o 4 por cento da facturación.
Despois
da presentación do relator e da xornada, na que participarán a
directora da AMTEGA, Mar Pereira; a directora da EGAP, Sonia
Rodríguez-Campos; e o presidente do CPEIG, Fernando Suárez, o
programa desenvolverase arredor dos seguintes bloques de contidos: o
regulamento nos actos xurídicos da UE (significado dun regulamento),
cuestións a salientar no regulamento (definicións, principios,
dereitos, obrigas do responsábel do tratamento, etc) e recursos,
responsabilidades e sancións.
Miguel
Ángel Davara
Miguel
Ángel Davara é doutor en Dereito e socio-fundador da firma de
asesores xurídicos Davara & Davara, Asesores Xurídicos,
especialistas en Dereito das Tecnoloxías da Información e as
Comunicacións. Catedrático de Dereito Informático e de Informática
para Xuristas da Facultade de Dereito da Universidade Pontificia
Comillas de Madrid (ICAI-ICADE), é tamén coordinador da Área de
Informática Xurídica de ICADE. Davara é director do Master en
Dereito das Tecnoloxías da Información e as Comunicacións de ICADE
e director dos Cursos de Doutorado en Dereito Informático na mesma
Universidade. Tamén exerce como profesor da materia Implicacións
socio-xurídicas das Tecnoloxías da Información na Escola de
Enxeñaría Informática de ICAI. Asemade, o relator é membro do
Grupo de Asesores Legais en Tecnoloxías da Información da Unión
Europea en Luxemburgo (DG Sociedade da Información).