O CPEIG introduce no miolo da tecnoloxía aos rapaces ingresados no CHUS
luns, 2 de xaneiro do 2017
O
Colexio Profesional de
Enxeñaría en Informática de Galicia (CPEIG) segue adiante, xa
en 2017 e coas
celebracións da Hora do Código aínda recentes, cos seus
esforzos en materia de divulgación TIC para os máis pequenos. Desta
volta, o labor didáctico, formativo e lúdico foi desenvolvido nun
espazo de especial significado nestas datas, o Complexo Hospitalario
Universitario de Santiago de Compostela o
CHUS.
Máis en
detalle, o CPEIG adicou a mañá de hoxe a amosar os segredos da
programación e a robótica a un grupo de crianzas de entre 5 e 16
anos. As nenas e nenos ingresadas/os no complexo de saúde puideron
deste xeito abrir unha xanela directa aos segredos da construción da
sociedade conectada.
A
experiencia, que
en palabras do CPEIG “foi do máis positiva”, constituíu a proba
piloto dun programa máis ambicioso que se pretende chegue a máis
centros hospitalarios.
No
caso de hoxe, Javier Pereira, colexiado do CPEIG, encargouse de levar
a cabo, de xeito voluntario, o obradoiro na aula informática do
CHUS. Pereira realizou en primeiro lugar unha breve introdución aos
conceptos de robótica e programación, acompañada de diferentes
vídeos ilustrativos. Nunha segunda parte, as nenas e nenos probaron
diferentes actividades e xogos elaborados coa ferramenta de
programación Scratch, en combinación co Makey Makey e outros
dispositivos tecnolóxicos como a webcam
do ordenador ou un rato de control cefálico.
Segundo
sinala o CPEIG, o
emprego destas ferramentas permite aprenderlles aos rapaces, “de
xeito doado
e dinámico”, como
programar o computador
e como
crear os seus propios videoxogos, historias interactivas ou
animacións. “Durante esta mañá”, engade
o colexio,
“o obradoiro estimulou a creatividade e outras capacidades
cognitivas, como son a resolución de problemas, a abstracción, o
pensamento lóxico ou o razoamento”. A
maiores, o CPEIG
cedeu tres
kits Makey Makey ao hospital para uso das nenas e nenos ingresados.