O CPEIG e Igualdade entregan os diplomas ás participantes nos cursos Rede-Emprende de Valga
mércores, 22 de xaneiro do 2014
O presidente do Colexio Profesional de Enxeñaría
en Informática (CPEIG), Fernando Suárez Lorenzo, participou
este pasado martes na entrega de diplomas ás alumnas do Programa
Rede-Emprende do concello pontevedrés de Valga. A achega
Rede-Emprende en Igualdade é unha iniciativa que naceu froito
da colaboración entre o Colexio e a Secretaría Xeral de Igualdade
da Xunta de Galicia a prol da formación inicial dunhas 150 mulleres.
Suárez concorreu no acto xunto coa secretaria xeral de Igualdade,
Susana López Abella, e o alcalde de Valga, José María Bello
Maneiro.
Segundo informa o CPEIG, a iniciativa xurdiu como
experiencia piloto e a idea era ofrecer accións e ofertas formativas
que xirasen arredor de cuestións como o asesoramento e o apoio ás
mulleres que tivesen un proxecto empresarial en mente, ou que
estivesen a piques de telo, ou simplemente que buscasen emprego e
formación. A partir de aí, a iniciativa colleu corpo e consolidouse
como unha oportunidade para axudar a un número significativo de
mulleres galegas de diferentes concellos sobre todo rurais a
concorrer no mercado e atopar un posto laboral, con plenos
coñecementos sobre innovación e manexo das novas ferramentas
tecnolóxicas de xestión, comunicación e distribución.
As colexiadas e colexiados do CPEIG encargáronse,
neste senso, de impartir como expertas/os na materia formación e
asesoramento en varios aspectos: iniciación a Internet e redes
sociais; novas tecnoloxías e emprendemento; novas tecnoloxías e
busca de emprego, e redes e transposición de experiencias. Cada
curso tivo unha duración de 20 horas, cun máximo de 20 alumnas en
cada edición, e desenvolvéronse nas aulas existentes nos propios
concellos ou a través da rede de aulas CEMIT, dependente da Xunta de
Galicia. Nesta primeira edición piloto formáronse mulleres nos
seguintes concellos: Guitiriz, Quiroga, Leiro, Xunqueira de Ambía,
Valga, Abegondo, Porto do Son, Tui, A Cañiza e O Carballiño.
Lembrar que Rede-Emprende en Igualdade responde ao
eixe terceiro do Plan Galego para a Igualdade entre Homes e
Mulleres (Secretaría Xeral de
Igualdade), que busca
“outorgar un maior protagonismo ás actuacións que contribúan a
facilitar a autonomía económica das mulleres galegas, o que leva a
fomentar o seu acceso ao mercado laboral, así coma o seu
desenvolvemento profesional e a posta en valor da súa iniciativa
emprendedora”, consonte á Estratexia para a igualdade entre
mulleres e homes 2010-2015 da Comisión Europea, que sinala o
seguinte: “a independencia económica é un requisito previo para
que mulleres e homes poidan controlar as súas vidas e teñan unha
auténtica liberdade para elixir”.