O CPEIG avoga polo uso responsábel de Internet na nenez
mércores, 12 de decembro do 2012
O Colexio Profesional de Enxeñaría en Informática de Galicia
(CPEIG) segue a
traballar na procura de recursos que contribúan a un emprego
racional das novas tecnoloxías da información entre os máis
pequenos, un dos obxectivos básicos, precisamente, do
seu programa Navega con Rumbo para as escolas galegas.
Segundo conta o presidente do colexio, Fernando Suárez, nunha
reportaxe de La
Nación sobre o problema da adicción de nenos e adolescentes ás
novas ferramentas dixitais, a clave non está en prohibir ou
restrinxir a toda costa, cousa que pecharía o acceso dos cativos á
contorna de seu, senón que a solución debe pasar por fomentar o uso
responsábel de Internet. Así, sinálase, mentres outros
profesionais avogan por limitar o acceso ou cuestionar as vantaxes
das redes, o CPEIG defende os beneficios formativos e comunicativos
destas ferramentas.
Segundo apunta o propio Fernando Suárez na dita reportaxe, “os
responsábeis da educación dos menores debemos ser conscientes do
enorme potencial que achegan na súa formación integral e coñecer
os límites ao seu uso que debemos impor, pero sempre dentro duns
parámetros nos que sopesemos claramente o valor que achegan as
tecnoloxías á educación dos nenos”, agrega. Nun panorama no
que se fai evidente que as TIC, malia non ser causantes directas de
patoloxías, poden alentar ou facer abrollar trastornos latentes, o
CPEIG tamén lembra que as redes son fontes de información e a
comunicación que aplican no seu formatos e metodoloxías que en
parte xa existían noutras fontes previas. A mesma cautela e o mesmo
interese positivo que se teñen por estas, débense ter polas TIC.
Segundo Fernando Suárez, "do mesmo xeito que os pais
preocupámonos por coñecer aos amigos dos nosos
fillos, debemos aplicar esta pauta aos amigos que teñen nas redes
sociais; do mesmo xeito que preguntamos onde van nos
seus intres libres, debemos saber por onde navegan na Rede",
sinala. O Colexio Profesional de Enxeñaría en Informática de
Galicia salienta tamén que “é fundamental ter un clima de
confianza cos fillos, sendo conscientes de que as restricións que se
poden expor nas casas ao uso das TIC desaparecen fóra
do fogar”.