O CITIUS e o Museo Domus convidan aos futuros investigadores a iniciarse de cheo no eido da robótica

Varias unidades do robot Pioneer 3DX, un dos protagonistas do evento

O centro CITIUS da Universidade da Santiago, en colaboración co Museo Domus da Coruña, vai convocar aos seareiros galegos da intelixencia artificial nunha xuntanza-taller na que terán, amais da oportunidade de tomarlle o pulso ás novas tendencias neste eido científico, iniciarse eles mesmos na creación dos seus propios robots. De feito, un dos obxectivos fundamentais da actividade de difusión Obradoirobot é permitir que os asistentes dispoñan de certas bases tecnolóxicas acerca da robótica móbil, e todo dun xeito participativo e lúdico.
Haberá pois obradoiros para amosar os fundamentos que permiten dotar a un máquina de capacidade sensorial, da posibilidade de realizar percorridos dun xeito intelixente ou como interactuar co robot mediante comandos visuais que guíen as súas actividades. Nos talleres empregaranse robots móbiles reais Pioneer 3DX e 3AT, de MobileRobots. A actividade terá lugar no Museo Domus-Casa do Home (A Coruña) o vindeiro martes 17 de xullo en dúas sesións (11:30 – 13:30 h e 17:30 – 19:30 h), e vai dirixida ao público en xeral e visitantes do Museo.
A continuación damos conta dos obradoiros incluídos no programa, punto por punto.
Taller 1: Intelixencia ambiental
Neste taller amosaranse os principios funcionais e operacionais básicos da intelixencia ambiental, isto é, a capacidade de incorporar no museo (e en calquera espazo) un conxunto de sensores, elementos de computación e comunicacións que permiten detectar eventos de interese e reaccionar ante eles. No taller exporase como integrar este novo paradigma coa robótica móbil para facilitar un despregue rápido e contextual dun robot en contornos novos e descoñecidos, sen necesidade de que participen expertos en robótica. Unha tarefa na que a Unidade de Sistemas Intelixentes do CITIUS está a traballar neste contexto é a implantación, co mínimo custe posible e case sen mantemento, dun robot-guía para un evento ou no propio museo. No taller empregaranse varias cámaras para detectar e seguir o robot móbil mentres se despraza polo museo, co obxectivo de construír un mapa do museo, que vai estar distribuído entre as diferentes cámaras e o robot. Con este mapa distribuído, o sistema é quen de xerar todas as rutas posibles entre calquera puntos do museo e de guiar ao robot para seguir a ruta seleccionada. Comprobaremos que o sistema é robusto fronte á presenza de persoas en movemento dentro do contorno,
Taller 2: Interacción xestual co robot
Segundo apunta o CITIUS, A interacción entre usuarios e robots é crítica para que o uso de robots fóra dos ambientes controlados dos laboratorios de investigación sexa algún día posible. Neste taller amósanse os recentes avances nesta área. Os asistentes poderán interactuar cun robot móbil a partires de xestos coas mans. O robot poderá identificar, entre un grupo de varias persoas, aquela que quere interaccionar con el. Ese usuario poderá controlar dun xeito sinxelo certas operacións do robot e mesmo poderá guialo polo contorno. O obxectivo final será que o usuario lle “ensine” ao robot dun modo moi sinxelo e intuitivo as rutas quere que realice, incluídas as paradas e as mensaxes ou tarefas que debe reproducir ou facer en cada parada. O robot será quen de reproducir esas rutas de forma totalmente automática.
Taller 3: Aprendizaxe automática
A programación de robots móbiles para a resolución de tarefas é un proceso complexo e delicado, moi dependente dos detalles do contorno e do robot (sensores, actuadores, ...). Neste taller probarase o funcionamento de diversos algoritmos da técnica de intelixencia artificial denominada aprendizaxe por reforzo. Farase que un robot aprenda, en tempo real e sen ningún tipo de información previa, o comportamento básico de seguir unha parede nun contorno acoutado. O reforzo consistirá en que un usuario, empregando un mando sen fíos (joystick), lle indicará ao robot cando está a facer mal a tarefa. Co mesmo mando, tamén poderá mover o robot para evitar situacións de risco (por exemplo, si se achega moito ou se afasta demasiado da parede, se se despraza cara a unhas escaleiras…). Estas indicacións serán de abondo para que o algoritmo de aprendizaxe teña en conta estas experiencias no futuro e efectúe a tarefa correctamente de xeito totalmente autónomo.