O CITIC e o Clúster organizan este xoves unha xornada sobre o potencial de negocio das TIC intelixentes
mércores, 2 de xullo do 2014
O CITIC
vai subir esta semana un novo chanzo na súa intensa actividade de
divulgación. Nesta liña informativa (complementaria da
investigadora e consecuencia desta) é onde se insire a xornada
técnica prevista para este xoves 3 de xullo, no propio edificio do
centro tecnolóxico coruñés no campus de Elviña. O evento
Tecnoloxías
Intelixentes: aplicacións e oportunidades de negocio,
organizado polo CITIC e mailo Clúster TIC Galicia, servirá entre
outras cousas para amosar de primeira man o potencial das tecnoloxías
intelixentes no eido empresarial.
Entre os proxectos que se van
presentar ao longo da xornada figuran o
proxecto inLOC para a localización de interiores (aproveitamento
de infraestruturas alternativas aos sistemas GPS, para o seu uso en
interiores, Wi-Fi principalmente pero tamén Bluetooth Low Energy ou
Ultrawideband) ou o
proxecto MiaSoft, do que xa
temos falado en Código Cero e que consiste nun software
integrado para o control e seguimento intelixente do Síndrome de
Apneas/Hipopneas do Sono, analizando os sinais monitorizados en
pacientes sometidos á polisomnografía nocturna.
Segundo informa
a organización do evento, os investigadores do CITIC estarán
dispoñíbeis para solucionar as dúbidas das persoas que estean
interesadas nestas ou noutras iniciativas do centro tecnolóxico,
presentando liñas de traballo e amosando as demostracións
específicas.
Xa nun plano máis concreto, a
xornada abrirase ás 11:00 horas
da man de Sebastián Bamonde Rodríguez, coordinador do CITIC, e
Antonio Rodríguez del Corral, presidente do Clúster TIC Galicia.
Segundo
informa Bamonde Rodríguez,
"para
o CITIC este tipo de xornadas e encontros son fundamentais para
presentar a axentes empresariais e administración as nosas
capacidades en investigación TIC, e
grazas
a eles fomentamos a transferencia tecnolóxica, unha das misións
principais do centro, facendo chegar os beneficios das nosas
solucións á sociedade”.
Pola
súa banda, Antonio Rodríguez del Corral, quen no marco da xornada
impartirá o relatorio Demandas
empresariais,
sinala que para o Clúster TIC Galicia a transferencia tecnolóxica é
un dos piares estratéxicos. "Con xornadas como a que agora
organizamos co CITIC buscamos achegar aos nosos asociados os
resultados de liñas de investigación que se desenvolven en Galicia,
co fin de promover proxectos innovadores de vocación global, na liña
que marca o programa europeo Horizonte 2020. Neste caso, ademais, é
moi destacable o feito de que esta xornada teña carácter
multidisciplinar, co que se poñerá en valor a capacidade das
empresas TIC para contribuír á modernización doutros sectores da
nosa economía," explica Del Corral.
Os
proxectos do CITIC que
se presentarán a través de demostracións prácticas serán os
seguintes:
·
Localización
en interiores: proxecto LocYu: aproveitamento
de infraestruturas alternativas aos sistemas GPS, para o seu uso en
interiores, sobre todo WiFi pero sen esquecer Bluetooth Low Energy ou
Ultrawideband.
·
Vídeo
sintético interactivo: syntheractive: sistema
distribuído capaz de xerar vídeo sintético e codificalo en tempo
real, facendo uso da potencia de cálculo dos procesadores gráficos
de consumo e de optimizacións en movemento de información entre
procesador central e procesador gráfico, para servir como
infraestrutura de base para a definición de servizos interactivos
masivos para a televisión dixital.
·
Sistemas
de recomendación e Big Data: proxecto FilmYou: motores
de recomendación baseados en sofisticados algoritmos de filtrado
colaborador capaz de xerar recomendacións personalizadas. O proxecto
concreto que se presenta é unha plataforma distribuída de
recomendación de películas.
·
Monitorización
intelixente aplicada á saúde: proxecto MIASOFT: software
integrado para a monitorización intelixente da síndrome de
apneas/hipopneas do sono, analizando os sinais monitorizados en
pacientes sometidos á olisomnografía nocturna.
·
SmartSocket - Enchufe intelixente que evita incendios e electrocucións: un
enchufe que se controla remotamente e que está orientado á
prevención de sobre-consumos e curtocircuítos. Monitoriza
constantemente o consumo dos aparatos eléctricos conectados a el,
podendo controlarse remotamente dende o móbil, tablet ou dende o PC.
·
VGLiDAR - Visualizador de datos LiDAR: é
un visualizador de datos LIDAR (Light
Detection and Ranging ou
Laser
Imaging Detection and Ranging).
A tecnoloxía LIDAR permite determinar a distancia dende un emisor
láser a un obxecto ou superficie utilizando pulsos de láser.
Utilizando esta tecnoloxía é posible obter unha nube de puntos do
terreo escanear creando unha representación tridimensional deste.