O CITIC e Gradiant súmanse ao #EuQuedoNaCasa
luns, 16 de marzo do 2020
Os
nosos centros de tecnoloxías da información están a aplicar no seu
seo medidas de choque laborais contra o avance do COVID-19. E fano
botando man dunha fórmula que xa hai anos que se aplica no seu seo:
a fórmula do teletraballo a través das contornas virtuais. Dende a
UVigo, o Centro
Tecnolóxico Gradiant adheriuse a pasada semana á proclama xeral de
evitar con desprazamentos laborais innecesarios o espallamento do
coronavirus.
“Deter
o avance do COVID-19 é unha necesidade e unha responsabilidade
colectiva”, fixo saber Gradiant nun comunicado, avanzando que
dende este luns o seu persoal ía “teletraballar para contribuír á
seguridade de todas e todos”. Gradiant tamén tivo palabras de
alento con respecto aos importantes esforzos que está a despregar o
colectivo sanitario: “Grazas aos heroes con bata por estar sempre
en primeira liña”.
Pola
súa banda, o
Centro de Investigación TIC (CITIC) da Universidade da Coruña
comunicou o peche das súas instalacións até novo aviso, unha
medida que irá complementada “co traballo a distancia de todo o
persoal do centro”, agás nos casos en que algún membro do equipo
deba acudir ao seu posto habitual con carácter excepcional “para
atender necesidades inaprazábeis”. O obxectivo do CITIC con estas
e outras medidas de control e responsabilidade sanitaria é “velar
pola seguridade e a protección do seu equipo, de acordo coa
información, recomendacións e protocolos activados polo Goberno e a
Xunta de Galicia”.