O CITIC acolleu a visita de Mar Barcón e José Ramón Gómez Besteiro
xoves, 7 de maio do 2015
Onte as instalacións do
Centro
de Investigación en Tecnoloxías da Información e as Comunicacións
(CITIC), impulsado pola Universidade da Coruña e emprazado no Campus
de Elviña, acolleron a visita de Mar Barcón, candidata do PSOE na
devandita cidade galega, xunto ao secretario xeral do PSdeG, José
Ramón Gómez Besteiro. Ambos foron recibidos polos representantes do
CITIC, encabezados polo seu coordinador, Manuel G. Penedo, e puideron
coñecer os máis de 3.000 metros cadrados dos que dispón o centro,
ao servizo da Investigación e o Desenvolvemento e a creación de
iniciativas con potencial de seren aplicábeis e rendíbeis no tecido
produtivo (transferencia tecnolóxica).
Segundo informa o CITIC,
durante a visita Barcón salientou o obxectivo do centro tecnolóxico
de converter a innovación e a investigación en factores clave para
o desenvolvemento económico da cidade e a súa contorna, a mellora
na formación dos mozos e a súa posterior incorporación ao mercado
laboral con empregos de calidade, “todo iso baixo o paraugas dun
compromiso real coa Universidade”, fixo saber, ao tempo que
recoñeceu o labor do CITIC como punto de unión e canle de
colaboración entre os achados tecnolóxicos xurdidos na Universidade
e o tecido empresarial.
