O CESGA pon en xogo a súa tecnoloxía de simulación para o estudo da orixe da vida
mércores, 9 de maio do 2012
- Recreación do Big Bang, a explosión que deu orixe ao Universo
A orixe da vida e
toda a cadea de acontecementos que se puido ter dado antes dela,
propiciándoa, non se estuda só dende os países máis avanzados en
investigación científica. Na nosa terra temos tecnoloxía para iso
e, sobre todo, profesionais. Así nolo certifica unha vez máis o
CESGA,
o Centro de Supercomputación de Galicia, que, en colaboración con
grupos do CSIC, está a traballar no estudo e interpretación das
achegas de grandes centros de rexistro do que se sitúa alén do noso
ceo, como o Observatorio Espacial Herschel ou dos radiotelescopios do
Proxecto ALMA. A clave, unha vez máis, está no supercomputador
galego FinisTerrae e nas posibilidades de simulación cuántica que
ofrece.
Como lembraremos, o
Observatorio Herschel atópase en órbita, entre a Terra e Sol, e a
estrutura de radiotelescopios ALMA en Atacama, Chile. Estes
equipamentos, xunto con outros, fornecen de xeito constante á
comunidade científica de grandes cantidades de información que lles
axudan a entender e desvelar os segredos do Universo, pero que cómpre
descifrar, interpretar e emprazar no seu sitio máis axeitado.
Segundo informan fontes do CESGA, avaliar estes datos é tan
fundamental como obtelos, e a isto se dedica unha manchea de equipos
científicos no mundo, entre os que se atopan os que dirixe Octavio
Roncero Villa no Instituto de Física Fundamental (IFF) do Consello
Superior de Investigacións Científicas (CSIC), que conta coa
capacidade de cálculo do CESGA e do devandito supercomputador.
Xa nun plano máis
concreto e segundo informa o centro galego, entre os elementos de
valor que se están a estudar coa axuda da tecnoloxía galega
atópanse os espectros de microondas e infravermello que rexistra o
satélites Herschel, ou os diversos compoñentes do espazo
interestelar e das atmosferas planetarias e estelares que reflicten
os equipos de ALMA, así como datos sobre a feitura dos cometas,
planetas e satélites. Este coñecemento, unido a outras informacións
relevantes, axudan aos grupos de científicos a entender mellor a
formación das galaxias no universo primitivo, a súa evolución e a
formación de moléculas ou biomoléculas. “Todo
iso”, engade o CESGA, “aumentará
o que xa se sabe en materias como a formación das estrelas tras o
Big Bang -a grande explosión que deu orixe ao Universo- e a
formación de estrelas e planetas en proceso de nacemento”.
Estes proxectos
científicos, explica Octavio Roncero, permiten "detectar
moléculas e a súa abundancia en nubes interestelares ou atmosferas
planetarias, pero fai falta coñecer o seu comportamento en colisións
con outras moléculas ou ións ou tras a absorción de fotóns para
modelizar a súa evolución".
Nas simulacións que
se están a efectuar dende supercomputadores como o FinisTerrae do
CESGA "obtéñense datos de enorme
utilidade", engade o científico
do CSIC, “que empregarán os
astrofísicos moleculares para o estudo da gran cantidade de
información obtida grazas ó Herschel ou ALMA, en proxectos de
decenas de anos de duración e moitos millóns de euros de custo".