O CESGA celebra os seus 20 anos de actividade encarándose á renovación do seu supercomputador
luns, 16 de decembro do 2013
- Javier García Tobío, actual director do CESGA, conduciu o acto desta tarde
Esta tarde o Centro de Supercomputación de Galicia (CESGA)
celebrou o seu XX aniversario nun encontro no Santiago de Compostela no que
fixeron un repaso dos logros deste Centro que é un dos motores da investigación
e a innovación en Galicia. No acto celebrado no Centro de Novas Tecnoloxías de
Galicia participaron figuras como o director da Axencia Galega de Innovación,
Manuel Antonio Varela Rey; Miguel Ángel Ríos, un dos impulsores do CESGA; o
actual responsable do Centro, Javier García Tobío; e o presidente da Xunta,
Alberto Núñez Feijoo; repartíndose durante a celebración un numero especial da
revista Código Cero no que se conmemoran os vinte anos de actividade do CESGA.
O
presidente da Xunta aproveitou esta oportunidade para dar conta do proceso de
actualización do supercomputador Finis Terrae, que terá lugar durante o ano
que vén, e que dotará a este equipamento de novas capacidades de procesamento
para manter ao CESGA nunha das posicións líderes no ámbito da supercomputación
europea.
Este novo proceso anunciado polo presidente galego forma parte, dixo, da
“aposta inequívoca” da Xunta polo mantemento do CESGA entre a elite do
desenvolvemento tecnolóxico, e que xa deu lugar, este mesmo ano, a un
investimento conxunto entre a Xunta e o Estado de 3,7 millóns de euros para
poñer en marcha a rede RECETGA-Nova. Segundo indicou, esa foi a chave para
“multiplicar por 800 a capacidade da rede científica e tecnolóxica que, co
CESGA como núcleo, une universidades, centros tecnolóxicos e empresas galegas”.
- O presidente da Xunta destacou que o CESGA renovará o seu supercomputador en 2014, para manterse como locomotora da innovación
Resaltou que co CESGA se puxo en marcha o supercomputador máis potente dos que
existían en España hai 20 anos, que activou o núcleo dunha crecente comunidade
investigadora que fai uso das súas capacidades de cálculo: desde as
universidades ata as unidades do CSIC, pasando polos centros tecnolóxicos ou
Meteogalicia.
Ademais, indicou que o Centro de Supercomputación creou o primeiro nodo de
conexión á Internet da Comunidade, sendo así “pioneiro no que hoxe é o máis
cotián: compartir información e coñecemento con outras persoas en calquera
parte do mundo”. E, ao mesmo tempo, abriu a porta “á internacionalización da
nosa ciencia”, en tanto que estableceu colaboracións cos grandes centros de
investigación, como a NASA ou o CERN de Xenebra, e permitiu involucrarse na
identificación do bosón de Higgs ou na loita contra o cambio climático.
Alberto Núñez Feijóo puxo en valor o traballo das 41 persoas que actualmente
operan neste centro baixo o mando de Javier García Tobío para, entre outras
cousas, “obter o máximo rendemento dun dos mellores supercomputadores de Europa
e o segundo mellor de España, como é hoxe o Finis Terrae”.
Segundo destacou o mandatario galego, as cifras arroxan “un máis que favorable
balance”, pois só na última década xurdiron do CESGA máis de 2.000 artigos de
investigación, 210 teses doutorais e 59 libros ou capítulos de libros. E, neste
tempo, albergou 171 proxectos de investigación que mobilizaron 533 millóns de
euros. Así mesmo, indicou que os datos do presente son “prometedores”, posto
que na actualidade o CESGA dá servizo a 550 investigadores e xestiona unha rede
que usan a diario 90.000 persoas, implicadas dalgún xeito na procura de
progreso científico que alumeará “sorprendentes e proveitosos resultados”.
- O director da Axencia Galega de Innovación, Manuel Antonio Varela Rey, participou neste acto conmemorativo
- Miguel Ángel Ríos fixo unha retrospectiva do CESGA, relatando os seus inicios
- Centos de persoas xuntáronse no CNTG para celebrar os vinte anos dos CESGA
- No acto repartíronse exemplares dun número especial da revista Código Cero
<script type="text/javascript" src="//e.issuu.com/embed.js" async="true"></script>
Edición especial de Código Cero dedicado aos 20 anos do CESGA