O CESGA aproveita a tecnoloxía cloud para loitar contra a malaria
martes, 2 de novembro do 2010
O Centro de
Supercomputación de Galicia (CESGA), na súa teima por levar os cálculos
matemáticos e as novas tecnoloxías a tódolos eidos posibles da sociedade
(facendo especial fincapé naquelo que mellora a calidade de vida das persoas),
vén de colaborar activamente nun proxecto virtual para a busca de novos
fármacos contra a malaria, unha enfermidade que mata anualmente a preto de 3
millóns de persoas.
O proxecto, no que
colabora coa Fundación Centro de Supercomputación de Castela e León (FCSCL),
consiste en empregar o cloud de
Computación de Altas Prestacións (HPC) entre centros de supercomputación, para
dar resposta á solicitude urxente do grupo Scientists
Against Malaria, unha organización virtual de investigadores de diferentes
disciplinas e pequenas compañías innovadoras que colaboran na busca de novos fármacos contra esta
enfermidade.
O traballo
enmárcase dentro do Proxecto Europeo do
Sétimo Programa Marco SYNERGY, que ten como principar obxectivo “consolidar estratexias de traballo
colaborador no campo do deseño de fármacos asistido por ordenador”.
O grupo de
investigación do Dr. Hugo Gutierrez de Terán, da Fundación Pública Galega de
Medicina Xenómica, (FPGMX) e membro do Scientists
Against Malaria, solicitou realizar, mediante diferentes métodos
computacionais, o cribado virtual dunha quimioteca
de 350.000 compostos químicos orixinais, a estudar sobre unha diana
terapéutica seleccionada para posteriormente desenvolver, a partir dos achados,
novos fármacos contra o parasito Plasmodium,
causante desta enfermidade.
O obxectivo é,
segundo informa o propio doutor,”xerar
unha lista de posibles moléculas candidatas para pasar a ensaio biolóxico,
empregando de forma paralela dúas metodoloxías independentes de acoplamento
ligando-receptor ou Docking”.
O CESGA, segundo informan, para non
prexudicar o traballo doutros usuarios do centro e ante a urxencia da
solicitude, que requiría gran cantidade de recursos de cálculo, “decidiu desenvolver un cloud computacional
híbrido en colaboración co FCSCL”, aproveitando o marco do acordo de cooperación
asinado meses atrás entre os presidentes das comunidades autónomas de Galicia e
Castela-León.
Esta é a
primeira experiencia internacional na que dous Centros de Supercomputación
crean un Cloud HPC conxunto utilizando equipamento de computación e
almacenamento distribuído entre ambas as dúas institucións.