O CCG profundará sobre o impacto da IA na creación cultural
xoves, 2 de novembro do 2023
A
presidenta do Consello
da Cultura Galega (CCG), Rosario Álvarez, compareceu na tarde deste
xoves 2 de novembro na Comisión Terceira de Economía, Facenda e
Orzamentos, do Parlamento de Galicia. Álvarez explicou as liñas
xerais de actuación desenvolvidas e avanzou a programación de 2024.
A relación entre cultura, patrimonio e turismo; a Intelixencia
Artificial aplicada á creación; a memoria da transición; a
proxección exterior, e a internacionalización da cultura galega son
áreas destacadas para o vindeiro ano. O orzamento da institución
para o próximo ano é de 3.206.556 euros, 130.780 euros máis que en
2022. Os representantes dos tres grupos parlamentarios expresaron o
seu recoñecemento ao labor da institución.
Segundo
dixo con máis detalle, a análise do impacto da Intelixencia
Artificial na creación cultural será un dos asuntos aos que
atenderá en 2024. Insírese no marco da liña titulada Novos
formatos e novos mercados da cultura, na que prestará atención
á revolución dixital na creación, formatos, difusión, acceso,
desfrute e conservación.
Outra
das liñas de acción denomínase Enerxías renovables,
sostibilidade e patrimonio cultural e afondará no modelo de
explotación do territorio e na súa relación co patrimonio
cultural. Nese ámbito estase a traballar nun informe sobre a
relación entre cultura, patrimonio e turismo, así como a xestión
do concepto de patrimonio.
Outra
das liñas é Memoria da Transición, baixo a que se
analizarán os discursos políticos, as mobilizacións sociais, a
conquista do autogoberno e a loita pola lingua e a cultura desta
época. Entre as prioridades para o vindeiro ano está tamén a liña
Unha cultura con identidade sen fronteiras, paraugas desde o
cal se reforzarán a proxección exterior e a internacionalización
da cultura galega; a cultura da emigración, e o diálogo con outras
culturas europeas.
Ademais,
seguindo fiel á liña de traballo habitual da institución, para
2024 están programados unha serie de informes encamiñados a avaliar
o sistema cultural. O Barómetro da Cultura Galega e as Conxunturas
realizadas polo Observatorio da Cultura Galega complementarán os
informes de impacto ambiental, os preceptivos para os Bens de
Interese Cultural (BIC) e outros que elabora de xeito periódico a
institución. Tamén se continuará prestando atención á
conservación e valoración de todo tipo de patrimonio (material e
inmaterial), así como ao fomento da cultura científica, tecnolóxica
e ambiental.
Respecto
da actividade de 2023 (que coincidiu co 40º aniversario da
institución), foron moi destacábeis (entre outros) eventos e
programas como a conmemoración do centenario do Seminario de Estudos
Galegos (cun congreso, unha andaina e unha xornada de análise e
comparación con outros centros coetáneos con características
similares); a mostra internacional Afonso X e Galicia (que
chegou São Paulo, onde estivo acompañada dun completo programa de
actividades e desde onde se trasladará a Río de Xaneiro, a partir
do 8 de novembro); a presentación do proxecto Seara. Discover
Galician literature through its texts / Descubre a cultura
galega a través dos seus textos, que ofrece traducións de
textos literarios ao inglés; a proposta Crossing borders. A
música TRAD galega atravesando fronteiras, un proxecto
audiovisual encamiñado a visibilizar, para o público estranxeiro, o
bo momento que está a vivir a música de raíz no país a través do
testemuño dos seus artífices.
Ademais,
o mes de setembro a presidenta, Rosario Álvarez, depositou o legado material e
simbólico de Rosalía de Castro na Caixa
das Letras que mantén o Instituto Cervantes.
Por
outra banda, o Observatorio da Cultura Galega analizou a situación
do sector audiovisual (a publicar a vindeira semana), e elaborou unha
conxuntura, un barómetro e o informe Corenta anos de cultura
galega en estatísticas, entre outros. Achegáronse outros
informes destacados como O valor económico do galego ou o
Informe sobre o impacto dos cultivos forestais con especies de
crecemento rápido no patrimonio natural e cultural de Galicia,
que analiza o impacto das plantacións forestais con especies de
crecemento rápido, especialmente o eucalipto, no patrimonio cultural
galego.