O CCG pecha na Rede o ano de Xela Arias cunha homenaxe musical
xoves, 23 de decembro do 2021
Nesta
recta final de ano aínda hai marxe para celebrar o legado creativo e
persoal da poeta Xela Arias, homenaxeada na última edición do Día
das Letras Galegas. Así
o entende o Consello da Cultura de Galega, que quixo pechar o ano de
Xela musicando un dos seus poemas, Dis ma-ma-má, de Darío
a Diario. Trátase dun produto web que contén unha
composición musical realizada polo músico Juanjo Cura e
interpretada polo coro Gestus Vocalis do Morrazo. O especial pon a
disposición da cidadanía a partitura e a interpretacion en audio e
vídeo.
“Todo
isto comezou cunha encarga que me fai Alberto Abal sobre Xela Arias”
explica Juanjo Cura que para cumprir ese cometido comeza a ler a súa
obra completa, detendo a mirada, chegado a certo punto, nas poesías
de Darío a Diario que Xela adicou ao seu fillo. Deste libro
escolleu Dis ma-ma-má, mesturado con outros poemas da obra. O
resultado é unha composición para coro que o CCG subiu á Rede este
23 de decembro a través da súa partitura coa correspondente
interpretación en audio e vídeo. “A idea é poñer a disposición
da cidadanía unha obra para coro baseada na autora homenaxeada este
ano co Día das Letras Galegas xunto coa súa interpretación para
que os cantantes poidan estudar a obra” asegura Juanjo Cura.