O CCG incrementa os seus fondos dixitais con novos números de A Nosa Terra
mércores, 18 de marzo do 2020
O
Consello da Cultura Galega segue a achegar contidos dixitais para
mitigar a reclusión forzosa derivada do estado de alarma (por mor da
crise sanitaria do COVID-19) e ampliar as posibilidades da Rede para
acceder ao coñecemento. A
máis recente incorporación ao fondo documental do CCG que temos
dispoñíbel online consiste na dixitalización de cen novos
números de A Nosa Terra, semanario desaparecido en
2011 e, en palabras do Consello, unha referencia de primeira man para
“comprender a historia recente do país”.
Os
novos números achegados forman parte dun amplo proceso de
dixitalización que abrangue un milleiro de números de A Nosa
Terra lanzados á rúa entre os anos 1977 e 2001 e que está a
ser impulsado polo CCG e a fundación que leva o nome do semanario a
través dun acordo específico.
A
presidencia de Xosé Ramón Barreiro na Real Academia Galega é a
portada do número 1.014 de A Nosa Terra. Segundo informa o
Consello da Cultura, co número 1.014 complétase o proxecto de
dixitalización e posta a disposición do público na Rede da etapa
en papel “desta histórica cabeceira”, en cuxas páxinas figuran
acontecementos tan relevantes como o conflito sobre a galeguidade da
obra de Cela trala concesión do Premio Nóbel, reflexións
documentadas sobre a política forestal, informes das comunidades
europeas coa recomendación de reducir a extensión do eucalipto na
Galiza, a guerra de Irak ou a supertaxa láctea, entre moitos outros
asuntos que aínda seguen vixentes.
“Os
1.014 exemplares subidos”, informou o CCG, “dan conta dun período
no que se produciron numerosos cambios socias e políticos e no que
agromaron tendencias como a recuperación da memoria histórica;
ademais tamén serve para coñecer como o equipo de redacción desta
cabeceira practicou un xeito novo de facer xornalismo e darlle cabida
a novos temas como o ecoloxismo, o feminismo, o mundo do traballo e
diferente xeito de tratar os deportes”.