O CCG activa un proxecto web para difundir as artes visuais galegas
mércores, 2 de setembro do 2020
O
Consello
da Cultura Galega (CCG) puxo en marcha un proxecto web para difundir
as artes visuais galegas, un catálogo de creadoras e creadores
entre os que figuran nomes tan senlleiros como Mónica Alonso, Xoán
Anleo, Manuel Sendón ou Tatiana Medal así como personalidades de
diferentes ámbitos que ofrecen unha lectura sobre esas obras. Estes
son os ingredientes de Na voz da obra, unha nova iniciativa
online que arrinca este mércores 2 de setembro coa ollada de
Celso Fernández Sanmartín sobre a peza A memoria do álbum. 1
de Manuel Sendón (A Coruña, 1951).
O
proxecto, antecedentes
En
xuño cumpríronse dez anos da presentación do
proxecto Atalaia, Arte Contemporánea en Galicia, un arquivo
virtual de artistas actuais de Galicia, impulsado polo CCG desde a
Sección de Creación e Artes Visuais Contemporáneas. A iniciativa
nacía co obxectivo de ofrecer ao público un achegamento informativo
e o máis global posíbel do contexto das artes visuais en Galicia.
“Atalaia”, segundo informou o consello da cultura, “é unha
base de datos, un directorio e un centro de recursos para coñecer
aos artistas, as obras, os eventos, as publicacións e as entidades
vinculadas á arte contemporánea en Galicia”.
Sobre
este material abrolla agora Na voz da obra, que pretende poñer
en valor este arquivo visual desde a relectura doutra mirada allea.
Cada
mércores, unha persoa convidada escollerá unha obra da base de
Atalaia e fará un comentario sobre ela dende a ollada crítica do
audiovisual, a estética, a poesía, a música, a ciencia ou a
filosofía. “Deste xeito, a voz dialogará coa obra nun xogo de
experiencia sensorial múltiple arredor dunha obra de arte da man
dunha figura de diferentes áreas”, engade o CCG.
