O Banco de Inglaterra lánzase a explorar as redes sociais na procura de información económica de valor
xoves, 8 de xaneiro do 2015
O Banco
de Inglaterra vén de habilitar un equipo técnico de profesionais
adicado en exclusividade a avaliar a información xerada en Internet
e as redes sociais co obxectivo de elaborar previsións e
predicións de tipo económico e financeiro. Con esta iniciativa, a
entidade británica (que é a que se determina a política que vai
seguir o Reino Unido en materia de finanzas), quere ampliar ao máximo
os escenarios de onde tira información de valor, usando as redes
para extraer datos que lle permitan anticiparse a todo tipo de
fenómenos e incidentes relativos á economía nacional. Segundo se
informa, o Banco desexa vixiar de preto como evoluciona a
recuperación produtiva do Reino Unido, considerando que as
comunidades 2.0 poden achegar en boa medida voces fiábeis e
inmediatas, síntomas e, en última instancia, remedios a aplicar.
Os especialistas, por
certo, xa están operativos, e entre os seus primeiros cometidos
atopouse o de avaliar a frecuencia coa que buscan emprego os cidadáns
internautas (posíbeis eivas laborais futuras) ou as tendencias e os
comportamentos que seguen os prezos dos produtos que se venden por
Internet (posíbeis inflacións). A xuízo dos responsábeis do
Banco, as estatísticas oficiais non son todo o inmediatas que sería
de desexar, pola contra “o que a exploración da Rede pode facer é
darnos unha lectura mellor do que está a pasar hoxe”.
Segundo se conta nos
medios, o equipo constituído pola entidade financeira está
integrado por expertos en analítica. O seu labor consiste, en parte,
en dar forma a modelos e algoritmos que faciliten a xeración de
información salientábel na morea de información xerada nas redes.
Ou sexa, que son recursos destinados a separar o gran da palla. O
Banco tamén salienta que a posta en marcha deste observatorio supón
un cambio de rumbo significativo do organismo respecto das
metodoloxías tradicionais, cambio cara ao ámbito 2.0 que de seguro
terá repercusión noutras entidades europeas de semellante cometido.