O BNG reclama axudas para cubrir as zonas de sombra da TDT en Galicia
martes, 28 de xullo do 2009
O
deputado do BNG no Congreso, Francisco Jorquera, vén de rexistrar unha
iniciativa parlamentaria na Cámara Baixa para demandarlle ao Ministerio de
Industria, “solucións para as poboacións
situadas nas denominadas zonas de sombra, como é o caso de moitos núcleos de
Lugo, que non poderán sintonizar a TDT despois de que o vindeiro 3 de abril de
2010 se produza o último apagón analóxico”.
Jorquera
amosa a preocupación do BNG de cara a última fase do apagón analóxico xa que,
segundo afirma, “existen unha serie de
problemas que aínda non teñen unha solución clara e definida, como por exemplo
os 7.000 habitantes da provincia de Lugo (aproximadamente o 2 por cento da
poboación), que non poderán sintonizar a
TDT”.
O
deputado do BNG recolle, asemade, que unha das posibles solucións que se
manexan é a de ”transmitir o sinal vía
satélite”, porén, afirma que “os
afectados terán que estar durante un tempo sen poder ver televisión posto que
non se pode solicitar a colocación das antenas até que non se produza o apagón.
Sen esquecer que terá custes para eles”.
É por
isto que o parlamentario nacionalista apela ao Plan de Actuacións de Apoio a
colectivos con risco de exclusión nos Proxectos de Transición da Fase I do Plan
Nacional de Transición. Un Plan que ten por obxecto a posta en funcionamento de
mecanismos de información preferente, protección e especial atención, dirixidos
aos integrantes dos colectivos que presentan especial risco de exclusións no
proceso de transición tecnolóxica.
A
pregunta que Jorquera lle dirixe ao Goberno Central é “se este Plan de Actuacións contempla a circunstancia das zonas de
sombra, e se inclúe axudas pola instalación de antenas vía satélite”.