O BNG denuncia a web do Instituto Cervantes por castelanizar topónimos galegos
luns, 29 de xuño do 2009
Mellid, El Cebrero, Monte
del Gozo ou Finisterre,
son algúns dos topónimos que, a día de hoxe, podemos ver na páxina web do
Instituto Cervantes, onde ademais, tal e como anunciaban a pasada semana no Xornal.com, son notables as
faltas de ortografía cometidas no tocante aos nosos termos, tales como
praza do Obradorio, referíndose á
Praza do Obradoiro compostelá onde se ubica a catedral de Santiago.
No tocante a isto, o deputado do BNG no Parlamento Galego, Bieito Lobeira, vén de presentar unha iniciativa na que lle demanda á Xunta de Galiza que interveña para que o Instituto Cervantes
corrixa os topónimos galegos
deturpados que aparecen nas súas publicacións.
En concreto, o deputado do BNG denuncia que no apartado do Centro Virtual
Cervantes relacionado
co Camiño de Santiago “aparecen topónimos
galegos deturpados como Mellid, El Cebrero,
Finisterre ou Palas de Rey”.
Lobeira
considera “intolerable que a estas
alturas haxa institucións públicas que, como o Instituto Cervantes, vulneren a
legalidade lingüística sen reparo algún, un feito que, aínda sendo recorrente, non
pode ser asumido con naturalidade polo Goberno de Galiza”.
Neste senso, o deputado do BNG pregúntalle á Secretaría Xeral de Política
Lingüística
pola súa avaliación “sobre o reiterado
incumprimento da legalidade toponímica referida a Galiza por parte do Instituto
Cervantes”, e en consecuencia,
pídelle que adopte medidas para corrixir esta situación.