O BNG avoga por un pacto pola ciencia que estabilice o investimento en I+D+i no 2% do PIB
mércores, 27 de abril do 2022
A
comparecencia de Francisco Conde no Parlamento de Galicia deste 25 de
abril, dando
conta dos detalles da Estratexia RIS3 de Especialización Intelixente
2021-2027, tivo réplica por
parte do BNG, a través da viceportavoz Olalla Rodil, quen
comezou a súa intervención tendendo unha man ao Goberno autonómico
para “acordar un pacto galego pola ciencia que permita converter a
I+D+i en motor de desenvolvemento do país situando de xeito
constante e o financiamento público do sistema de innovación no 2%
do PIB”.
Segundo
criticou Rodil, a estratexia “non corrixe as eivas detectadas na
anterior estratexia”, cuxos resultados, comentou, “fracasaron nun
dos ámbitos de actuación fundamentais para Galiza, que son as
empresas innovadoras”. Estas, dixo, “reducíronse nun 14% (de 997
a 853)”, e ademais “o número de patentes pasou de 146 a 73,
cando o obxectivo ademais era de 153, e o investimento en I+D+i
atópase no 0,97% cando o obxectivo era alcanzar o 1,7% do PIB”,
comentou.
“Non
é que non acadaran obxectivos, é que estamos en peor posición hoxe
que a que tiñamos cando se elaborou a RIS3 anterior”, recriminou a
tamén portavoz parlamentaria de Ciencia e Innovación, quen ademais
censurou que “a nova estratexia só se enfoca na innovación
empresarial esquecendo por completo a ciencia e a investigación e, o
máis importante, as persoas que investigan e producen coñecemento”.