O Ateneo Ferrolán pon en marcha unha campaña en liña para salvar o seu patrimonio
luns, 25 de maio do 2015
O Ateneo
Ferrolán vén de pór en marcha unha campaña na Rede para salvar o
seu patrimonio. Trátase da iniciativa de micromecenado Apoia
ao Ateneo Ferrolán, impulsada dende Facebook e cunha páxina
específica para canalizar as achegas, achegas.ateneoferrolan.org.
A campaña para a busca de apoios e Internet veu dada, segundo
informan fontes do Ateneo, polas obras municipais de restauración do
edificio que acubilla a entidade veciñal, e que a obrigaron a
retirar todo o seu patrimonio e trasladalo a unha empresa de
mudanzas.
“A
negativa do Concello, que foi o promotor da obra, a asumir estes
gastos levou a que a empresa Mudanzas Félix demandase ao Ateneo e a
entidade foi condenada ao pagamento de máis de 39.000 euros”,
informa a dirección da entidade veciñal, que engade que ante os
atrancos para afrontar a débeda, púxose en marcha a devandita
campaña de recollida de axudas.
Os bens que
se queren salvagardar e recuperar, arestora acubillados en seis
contedores (dende hai cinco anos) están integrados por unha
hemeroteca, unha biblioteca, os arquivos do Ateneo e unha longa serie
de bens diversos.
Como
dixemos, a campaña centralizase na web
achegas.ateneoferrolan.org,
a través da cal o Ateneo solicita a axuda das “persoas preocupadas
pola situación económica da entidade”, que poden colaborar a
través desta web facendo contribucións con tarxeta de crédito ou
transferencia bancaria, e incluso mediante a moeda virtual faircoin.
O Ateneo recolle doazóns tamén na secretaría da entidade na súa
propia sede.