O Arquivo da Experiencia xa se pode consultar na web

O Arquivo da Experiencia, que comezou a gravarse en A Coruña a finais de outubro para recompilar documentos e testemuños de persoas de máis de 55 anos para construír unha fonte de información e enriquecer a memoria histórica colectiva comeza a dar os seus primeiros pasos na Internet, e xa se poden consultar os primeiros vídeos desta interesante escolma.
A web do Arquivo da Experiencia presenta os seus contidos en distintas seccións, podendo consultarse os vídeos dende a sección de testemuños (con gravacións de todo tipo) ou dende a de monográficos, na que se seleccionan as intervencións cidadás segundo a temática tratada. Amais, tamén se pode explorar a web a través dun índice con 5 grandes bloques que dividen o Arquivo en Cultura, Sociedade, Economía, Acontecementos e Deportes (con 10 subtemas cada un).

Cómpre destacar o feito de que cada vídeo se pode ver na web mediante un reprodutor Flash, se pode descargar en formato Windows Media Video de alta calidade (464 x 260 píxeles a 500 Kbps) e mesmo se pode copiar o código que permite incorporar os vídeos nas novas páxinas web e blogs, abrindo o Arquivo da Experiencia a toda a Internet.