O Álbum de Galicia incorpora a entrada de Celso Emilio Ferreiro
mércores, 5 de abril do 2023
O
Álbum de Galicia, enciclopedia online do Consello da
Cultura sobre as grandes figuras históricas galegas, comezou abril
incorporando unha nova e relevante entrada: a
do escritor Celso Emilio Ferreiro (Celanova, 1912 – Vigo,
1979).
Ramón
Nicolás é o autor da súa entrada no Álbum de Galicia, a
colección dixital de biografías que mantén o Consello da Cultura
Galega.
Celso
Emilio Ferreiro foi un dos grandes poetas galegos do século XX.
Destacou cunha prolífica obra, na que a miúdo plasmou as súas
preocupacións sociais e políticas e na que incluíu, ademais de
composicións de carácter reivindicativo, outras máis intimistas e
irónicas.
Nado
en Celanova, Celso Emilio Ferreiro formouse cos frades escolapios do
mosteiro de San Salvador entre os anos 1919 e 1929, momento en que
comezou a cultivar a escrita e a publicar os seus primeiros poemas
nas cabeceiras Faro de Vigo e Heraldo de Galicia.
Criado nun ambiente republicano e galeguista por influencia do seu
pai, que fora membro das Irmandades da Fala, fundou en 1932 as
Mocedades Galeguistas do distrito de Celanova.
É
autor, entre outras obras históricas, de Longa noite de pedra
(froito da súa estadía en prisión, no mosteiro de San Salvador,
onde pasou catro días e tres noites logo de ter sido denunciado ante
as autoridades militares fascistas por unha veciña), O soño
sulagado (1954), Cantigas de escarnio e maldecir (1968) ou
o libro de relatos A fronteira infinda (1972).
Álbum
de Galicia
En
xaneiro de 2020 o Consello da Cultura Galega presentou o Álbum de
Galicia, unha colección dixital de biografías de persoas que
destacaron en moi diversos ámbitos: a sociedade, a ciencia, a
cultura ou a empresa. A idea é dar visibilidade e perspectiva de
conxunto ás numerosas mulleres e homes, xa finados, que contribuíron
de maneira significativa á sociedade galega ao longo da súa
historia. En moitos casos, seguen a ser grandes descoñecidos para o
público de todas as idades, de dentro e de fóra do país. A día de
hoxe, o Álbum conta con máis de 660 entradas.
