O 60% das queixas presentadas ante Rede de Centros Europeos do Consumidor tiveron a súa orixe no e-commerce
mércores, 20 de febreiro do 2013
A nivel europeo, quen
representa aos consumidores é, en boa medida, a ECC-Net,
que é a Rede de Centros Europeos do Consumidor, entidade financiada
pola Comisión Europea e organismos dos diferentes países que a
integran, máis Islandia e Noruega. Este tecido integrador de
entidades espalladas por todo o ámbito da UE realiza cada ano un
informe no que se detallan, entre outras cousas, o número de persoas
atendidas, os servizos máis demandados e, tamén, os sectores que
amorean máis reclamacións. Como detalle a salientar, dicir que na
investigación figura que no centro atendéronse 72.000 consultas e
reclamacións, das que o 60%, arredor de 32.000 queixas tramitadas,
tiveron relación co correo electrónico.
Porén, sinálase, isto
non demostra que o eido das vendas en liña sexan pouco de fiar (todo
dependerá da empresa), senón máis ben que a actividade
produtividade de comercio electrónico non para de medrar. Un terzo
destas reclamacións tiveron que ver co sector transporte, unha boa
parte das cales, co transporte aéreo. Falamos do 22% do total. Isto
ten unha explicación ben clara: a tradicional picaresca das
compañías de voo, que son probablemente as únicas empresas que
nunca che din, de boas a primeiras, o prezo final do produto que
buscas (só ao final, logo das taxas, recargos e servizos extras cos
que che agasallan).
Outro dos sectores
especialmente problemáticos foi o dos produtos médicos non
farmacéuticos e outros artigos ligados aos tratamentos terapéuticos.
Isto, sinala a rede de consumidores, “reflicte unha crecente
tendencia a mercar produtos medicinais en liña, con frecuencia con
erróneas e infundadas razóns médicas, sendo as pastillas de
adelgazamento un primeiro exemplo disto”.
Por certo que case a metade das reclamacións
resolveuse cun acordo amigábel.