O 18 de marzo lánzase a segunda consulta ao mercado do proxecto Aldeas Intelixentes
venres, 4 de marzo do 2022
A
Xunta
lanzará o 18 marzo a súa segunda consulta pública ao mercado do
proxecto Aldeas intelixentes, solucións de futuro para aldeas
sustentábeis, unha
iniciativa destinada a crear sustentabilidade, emprego, coñecemento,
respostas ao cambio climático, innovación, solucións tecnolóxicas
e, sobre todo, posibilidades de futuro para o noso rural. Así o
anunciou a directora xeral da Axencia Galega de
Desenvolvemento Rural, Inés Santé, durante a súa participación no
Foro Esenciais en bioeconomía, organizado pola Axencia Galega
da Industria Forestal (XERA).
No
apartado do evento dedicado ao rural, a directora xeral referiuse a
esta iniciativa do Goberno galego que persegue obter solucións
innovadoras para impulsar a recuperación dos núcleos rurais.
Segundo apuntou, o seu obxectivo “é conseguir un territorio rural
galego intelixente a través da creación dunha rede de aldeas modelo
que potencien os grandes valores das áreas rurais e que proporcionen
aos actores locais as ferramentas para aproveitar o seu potencial
contribuíndo así a grandes retos como a seguridade alimentaria, a
demografía ou o cambio climático”.
Inés
Santé salientou que se busca desenvolver e implementar na rede de
aldeas modelo unha serie de solucións innovadoras en catro liñas
diferentes: incidindo no desenvolvemento de servizos dixitais rurais,
en solucións tecnolóxicas para a bioeconomía en aldeas, na
sustentabilidade e economía circular da produción agraria en aldeas
modelo e, por último, na construción e urbanización sustentábel
nas aldeas con solucións baseadas na natureza e na transición
enerxética.
A
directora xeral da Axencia Galega de Desenvolvemento Rural lembrou
que na primeira consulta presentáronse un total de 168 propostas, a
cargo de 124 pemes e de 44 corporacións.
A
iniciativa enmárcase na Estratexia Galicia Dixital 2030 e no
programa territorio intelixente que impulsa a Axencia para a
Modernización Tecnolóxica de Galicia. Conta cun orzamento inicial
superior aos 5 millóns de euros de fondos propios da Xunta, que se
espera poder ampliar con outras fontes de financiamento vinculadas a
Next Generation UE ou ao programa FID do Ministerio de Ciencia e
Innovación para acadar un orzamento global próximo aos 15 millóns
de euros.