O 012 tramitou medio millón de chamadas no primeiro semestre do ano
martes, 7 de agosto do 2012
A empresa Contactnova, que
xestiona o teléfono de Atención e Información ao Cidadán da
Xunta, o 012, fixo reconto esta semana do acadado, en materia de
servizo á cidadanía, ao longo do primeiro semestre deste ano. Máis
polo miúdo, foron preto de medio millón de chamadas as tramitadas
nese tempo. O
dato foi dado a coñecer durante a visita do conselleiro de Presidencia, Alfonso
Rueda, ás instalacións de Contacnova, firma pertencente ao grupo
Netaccede, emprazadas aquelas no Polígono de San Cibrao das Viñas
en Ourense.
O novo servizo, fíxose saber,
foi posto en marcha en xuño do pasado ano para centralizar a xestión
de dez teléfonos de información que até ese intre operaban de
xeito independente. Con esta nova distribución dos recursos,
engadiron os responsábeis do 012, “acadouse
un aforro de 1,5 millóns de euros para a Administración
autonómica”. Só no primeiro ano de
funcionamento, “o 012 atendeu preto de
828.000 chamadas de persoas que buscaban algún tipo de información
relacionada coa Administración galega”.
Os teléfonos integrados neste
servizo son os destinados á información en materia de vivenda (902.100.054);
asesoramento para mulleres (900.400.273);
o teléfono Quérote (902.141.617);
teléfono Xove (902.152.535);
o de Voluntariado (900.400.800);
o teléfono de atención aos usuarios del Servizo de Emprego de
Galicia (902.125.000
e 902.262.902 para
demandantes e empresas, respectivamente); o teléfono social
(900.333.666); e o
teléfono 065.