Novos obradoiros para mellorar a comunicación na empresa, da man de FEUGA

A Fundación Empresa-Universidade Galega (FEUGA), vén de anunciar que ao longo deste mes de outubro vai organizar dous novos obradoiros formativos de carácter práctico, destinados a incentivar e mellorar a capacidade de comunicación e de innovación no seo da empresa galega.
Estas novas actividades de formación empresarial, van encamiñadas a potenciar a cualificación de directivos, xerentes, consultores, investigadores e profesionais en xeral que forman o organigrama das pequenas e medianas empresas instaladas na nosa comunidade.
O primeiro dos cursos formativos terá lugar os vindeiros días 9 e 10 e neles, porase a proba a capacidade de comunicación das empresas galegas, así como a capacidade dos seus directivos para liderar o mercado fronte á competencia.
Baixo o título xenérico: Reaching out- A tu alcance, este taller fará posible que os participantes recoñezan as súas carencias e virtudes como comunicadores e, asemade, permitiralle aos asistentes, realizar exercicios de presenza física e de respiración e control de nervios. O programa inclúe, asemade, unha serie de actividades para traballar en técnicas de presentación e para realizar prácticas individualizadas e colectivas para “conectar coa audiencia vendendo as propias ideas e falando con credibilidade”.
O outro curso ofertado para este mes de outubro por FEUGA, terá lugar ao longo dos días 13, 14 e 20 e 21 deste mes e ten como obxectivo posibilitar que os participantes exploren os elementos básicos do proceso creativo e poñan en práctica a habilidade de integrar diferentes contidos con distintos formatos, estimulando as actitudes e as habilidades innovadoras.
Baixo o nome, Innovar desde el interior, este obradoiro desenvolverase, ao igual que o anterior, na sede central da Fundación en Santiago de Compostela, e ámbolos dous serán impartidos por Kim A. Page, formadora especializada nas disciplinas de técnicas de voz, escritura creativa, pedagoxía e comunicación empresarial.
Estas novas actividades formativas contan, para o seu desenvolvemento, coa colaboración do portal dos innovadores Infonomía, e a Dirección Xeral de I+D+i da Xunta de Galicia. Os interesados poden recibir máis información sobre estes ou outros programas na páxina oficial de Feuga, ou a través do teléfono 981 534 180.