Novos Medios desenvolve o día 13 unha xornada sobre canles dixitais ao servizo da ciencia

As entidades participantes na Semana da Ciencia galega semella que non queren deixar de lado unha das grandes cuestións do noso tempo: cara a onde vai a información agora que os cidadáns xa non son simples receptores de datos, senón axentes activos en toda a cadea de produción e divulgación dos mesmos? Estas e outras cuestións, aplicadas non tanto á comunicación dixital ao servizo de toda a sociedade senón ao servizo da ciencia, serán o alicerce do obradoiro Comunicar a Ciencia: Os medios de comunicación e a divulgación do coñecemento.
A actividade, dirixida ao público en xeral, desenvolverase na Facultade de Ciencias da Comunicación o vindeiro 13 de novembro e en horario de 10 a 14 horas.
A organización da xornada (o Grupo Novos Medios da Facultade de Ciencias da Comunicación) dividirá a sesión en dúas quendas: primeiro un obradoiro práctico e posteriormente unha mesa redonda. Ámbalas dúas actividades comparten obxectivos: familiarizar ao cidadán de a pé coa vocación divulgativa dos medios de comunicación e as iniciativas, ferramentas, institucións e servizos dispoñibles en Internet que permitirán que os alumnos localicen datos científicos de maneira “rápida e proveitosa”.