Nove de cada dez usuarios TIC emprega decote software libre

Portalprogramas.com segue adiante coas súas accións a prol da programación aberta e de asegurar un panorama de cidadáns con acceso total, libre e igualitario, ao coñecemento. Nesta liña insírese o Informe de valoración do software libre 2012, a nova edición dunha investigación que leva a cabo cada ano o Observatorio de PortalProgramas e que se dirixe a tomarlle o pulso ao open source a nivel español e latinoamericano. O informe, dispoñíbel na web, trata de dar resposta ás seguintes preguntas: coñecen os usuarios domésticos, realmente, o software libre? Está estendido de verdade o seu uso? Confíase nel? En termos xerais, practicamente 9 de cada dez usuarios das TIC emprega con regularidade servizos de código aberto, incrementándose a súa taxa, en relación ao ano pasado, nun 15%.
Isto, sinala Portalprogramas, “amosa a popularidade cada vez maior de programas como Firefox, OpenOffice ou Emule”.
Entre as restantes conclusións do estudo, feito sobre a base de 5.000 persoas, está a seguinte: arredor do 65% dos enquisados cambiarían os seus programas propietarios por achegas libres en caso de obter compatibilidade (sobre todo) e gratuitidade (factor determinante en menor medida). Asemade, o número de persoas que trabuca software libre con software gratuíto diminuíu nun 10% e, amais, o coñecemento que se ten en Latinoamérica da programación aberta duplicouse con respecto ao que se tiña amosado o ano anterior. Por navegadores, no informe tamén se nos di que só un 4% máis de usuarios de software libre prefire Firefox a Chrome.